Ambasadori King-Smith: Nga 11 tetori pasaporta e vaksinimit do të njihet edhe në Britaninë e Madhe

Lajmi bëhet me dije nga ambasadori i Britanisë së Madhe në Shqipëri, Alastair King-Smith përmes një postimi në “Twitter”.

“Lajm i mirë për shqiptarët, britanikët dhe shtetasit e tjerë që nisen për në Mbretërinë e Bashkuar nga Shqipëria. Nga 11 tetori, certifikatat e vaksinave të lëshuara në Shqipëri do të njihen edhe në Britaninë e Madhe”, shkruan ai.

Tre javë më parë Komisioni Europian miratoi certifikatën e vaksinimit të dhënë nga Shqipëria duke theksuar se ajo është e njëvlefshme me ato të vendeve të Bashkimit Evropian. Rrjedhimisht, çdokush që ka atë certifikatë, të marrë pas një vaksine të miratuar nga EMA do të mund të lëvizë lirshëm në vendet e Bashkimit Europian.