Arrestimi i Fredi Belerit “alarmon” edhe kryeministrin grek, ministri i Jashtëm Nikos Dendias telefonon Ramën

Firmoset urdhër arresti për Fredi Belerin! Çfarë shkruhet në vendimin e Gjykatës

Mediat në Greqi raportojnë se për arrestimin e kandidatit të koalicionit “Bashkë Fitojmë” për bashkinë  e Himarës, Fredi Beleri është vënë në dijeni edhe kryeministri grek, Kyriakos Mitsotakis.

Referuar burimeve diplomatike, Protothema raporton se Nikos Dendias ka kontaktuar me kryeministrin e Shqipërisë Edi Rama në lidhje me arrestimin e Belerit dhe te dy personave të tjerë.

Ndërkohë më herët, Dendias kishte vënë në dijeni për këtë çështje kryeministrin grek Kyriakos Mitsotakis.

Sakaq, ambasadorja greke Kostantina Kamitsi ka shkuar në ministrinë e Jashtme shqiptare, ku kishte kërkuar takim me ministren Olta Xhaçka, por është pritur nga një prej drejtorëve në këtë institucion.

Ajo ka qëndruar për disa minuta në ministri dhe ka shprehur shqetësimin e palës greke në lidhje me arrestimin e Fredi Belerit.

Sipas vendimit të Gjykatës, në momentin e arrestimit Fredi Beleri së bashku me persona të tjerë, u kap duke premtuar dhe dhënë shuma monetare personave të ndryshëm me qëllim blerjen e votës.

“Dhionisios Alfred Beleri është kapur në flagrancë në Himarë më datë 12.05.2023 ora 00:14 minuta, në bashkëpunim me persona të tjerë, duke premtuar dhe dhënë shuma monetare personave të ndryshëm me qëllim blerjen e votes”, thuhet në vendimin e Gjykatës.

Ndaj tij, është ngritur akuza për “Korrupsioni aktiv në zgjedhje kryer në bashkëpunim”.

Vendimi i gjykatës: 

Në Vlorë, më 12.05.2023 ora 09:45, une Orgert Thoma, Oficeri i Policisë Gjyqësore, pranë Prokurorisë së Rrethit Gjyqësor Vlorë, në bazë të neneve 251 dhe 255 të K. Pr. Penale, mbaj këtë procesverbal për arrestimin në flagrancë të shtetasit:

Dhionisios Alfred Beleri, i biri i Petro dhe i Kasiani, i datëlindjes 09.08.1972 lindur në Himarë dhe banues në Himarë, me arsim të lartë, kombësia Greke, shtetësia Shqiptare dhe Greke, gjendja familjare i martuar, gjendja gjyqësorë dënuar me parë me 3 vjet heqje lirie për veprën vepren penale “Nxitje dhe urrejtje nacionale”, në vitin 2003, i identifikuar nga policia gjyqesore nr ID…..

Arrestimi u krye si autor i dyshuar për kryerjen e veprës penale të “Korrupsioni aktiv në zgjedhje kryer në bashkëpunim”, parashikuar nga neni 328 e 25 te K.Penal, që ka ndodhur në rrethanat si më poshtë:

Ky shtetas është kapur në flagrancë në Himarë më datë 12.05.2023 ora 00:14 minuta, në bashkëpunim me persona të tjerë, duke premtuar dhe dhënë shuma monetare personave të ndryshëm me qëllim blerjen e votes.

Të arrestuarit në flagrancë iu bë e ditur se në bazë të nenit 255 ka të drejtë të ketë mbrojtës, se nuk ka detyrim të bejë deklarata dhe në qofte se do të flasë, çfardo që ai thotë, mund të përdoret ndaj tij në gjykim. I arrestuari deklarojë se:

Mbrojtja të bëhet nga një avokat i zgjedhur prej tij konkretisht në prani të avokat Romarjo Meminaj, i cili është i pranishëm.

Procesverbali i arrestimit në flagrancë lexohet dhe nënshkruhet pa verejtje. Një kopje e këtij procesverbali i dërgohet prokurorit dhe i arrestuari vihet në dispozicion të tij në dhomat e paraburgimit.

Me pëlqimin e të arrestuarit u njoftuan familjaret e tij.