Berisha shfrenon fantazinë: Ilirin e qëlluan me plumba gome me snajper

Kreu i Partisë Demokratike, Sali Berisha, ka reaguar ashpër pas përplasjes së sotme mes protestuesve dhe policisë, duke ngritur akuza për përdorim të tepruar të forcës nga ana e efektivëve.

Në një dalje për mediat, Berisha u shfaq krah një protestuesi të lënduar dhe pretendoi se ai është goditur me plumba gome nga snajperët e policisë gjatë tubimit. Sipas tij, përdorimi i këtyre mjeteve ka rrezikuar seriozisht jetën e protestuesve.

Ai deklaroi se protestuesi Ilir Tushe është goditur në ballë me plumb gome, duke theksuar se goditja në këtë zonë përbën rrezik të lartë për jetën. Berisha shtoi gjithashtu se deputeti Bledion Nallbati ka pësuar hematomë në kokë pas goditjes me shkop gjatë përplasjes me forcat e rendit.

Sipas kreut të opozitës, përdorimi i plumbave të gomës mund të ketë pasoja të rënda, duke argumentuar se në raste të caktuara ato mund të shkaktojnë dëmtime serioze në kafkë. Ai e cilësoi të pajustifikuar ndërhyrjen e policisë dhe theksoi se protestuesit janë goditur pa arsye.

Deklaratat e Berishës vijnë pas tensioneve të forta që shoqëruan protestën e opozitës në Tiranë, ku pati përplasje mes protestuesve dhe forcave të rendit, përdorim të mjeteve piroteknike dhe ndërhyrje policore për shpërndarjen e turmës.