Biznesmeni i njohur ofrohet si kandidat i PD në Bashkinë Tiranë

Ish-kandidati i Partisë Demokratike për deputet, Ethem Aga, i sqaroi për “Terminal” me Aurora Sulçen zërat që e lidhin me një kandidim të mundshëm për Bashkinë e Tiranës në zgjedhjet e pjesshme kundër Ogerta Manastirliut.

Aga deklaroi se do të jetë aktiv në fushatë, qoftë si kandidat, qoftë si pjesë e stafit të personit të përzgjedhur nga opozita e bashkuar. “Unë shpinën luftës nuk ia kthej. Do të jem pjesë e fushatës së Partisë Demokratike. Do të luftoj me të gjitha energjitë e mia që opozita e bashkuar të fitojë dhe t’i japë një fytyrë tjetër Tiranës,” tha ai.

Sipas Agës, thelbësore nuk është emri i kandidatit, por figura që do të ndërtohet dhe që do t’i japë siguri qytetarëve për ndryshim real. “Emri nuk është aq i rëndësishëm sa figura që ne do të ndërtojmë gjatë negociatave të këtyre ditëve. Ajo do të përfaqësojë politikën e opozitës së bashkuar,” theksoi ai, duke nënvizuar nevojën për një emër që bind banorët e kryeqytetit.

Aga shtoi se proceset e përzgjedhjes duhet të përqendrohen te aftësia për të komunikuar vizionin e ndryshimit dhe për të rikthyer besimin e qytetarëve te drejtimi i Bashkisë së Tiranës.