“Sa do doja të kisha në dorë edhe biletën tënde”

Bashkëshortja e artistit të ndjerë Shpat Kasapi ka prekur ndjekësit me një postim mjaft emocional në rrjetet sociale. Nëpërmjet një fotografie të publikuar në Instagram, Selvije Jao ka ndarë një moment personal, të mbushur me mall dhe dhimbje.

Në imazh shihet një biletë udhëtimi drejt Italisë, ku ajo po qëndron për trajtimin mjekësor të djalit të tyre. Krahas fotos, ajo ka lënë një mesazh të shkurtër, por tepër domethënës, duke shprehur dëshirën që ky udhëtim të mos ishte i vetëm.

“Sa do doja, më shumë se çdo gjë, ta kisha edhe biletën tënde në dorë”, shkruan ajo, duke prekur zemrat e ndjekësve.

Shpat Kasapi u nda nga jeta rreth tre javë më parë, në moshën 40-vjeçare, si pasojë e një ataku kardiak, duke lënë pas një boshllëk të madh te familjarët, miqtë dhe publiku që e deshi.