Deklarata e fortë e Trump: Nëse nuk fitoj unë, merr fund demokracia

Kandidati për President i SHBA, Donald Trump ka deklaruar gjatë fushatës elektorale se nëse ai nuk fiton zgjedhjet presidenciale në nëntor, do të jetë fundi i demokracisë amerikane.

Gjatë fjalimit të tij në Ohajo, Trump tha se nëse nuk fiton zgjedhjet e përgjithshme të 5 nëntorit, demokracisë amerikane do t’i vijë fundi.

“Nëse nuk i fitojmë këto zgjedhje, nuk mendoj se do të keni zgjedhje të tjera në këtë vend”, tha Trump.

Trump, i cili është nën padi në Georgia për përpjekje për të përmbysur rezultatet e zgjedhjeve të vitit 2020 atje, fitoi mjaft delegatë këtë javë për të siguruar matematikisht nominimin republikan. Gara e përgjithshme zgjedhore me Biden ka shumë të ngjarë të jetë jashtëzakonisht e ngushtë.

Ish-presidenti republikan po përdor gjithnjë e më shumë gjuhën distopike në fjalimet e tij të fushatës për gjendjen e vendit.

Në fjalimin e tij për vendosjen e tarifave për makinat e importuara dhe konkurrencën e huaj për industrinë amerikane të automobilave, Trump deklaroi: “Nëse nuk zgjidhem, do të ketë një gjakderdhje për të gjithë vendin”.