Del FOTOJA e ish-efektivit që u gjet i djegur në Llogara

Është publikuar fotografia e ish-efektivit të Policisë së Shtetit, Artjon (Artjol) Xhelo, i cili u gjet i djegur brenda automjetit të tij pasditen e sotme në zonën e njohur si “Qafa e Llogarasë”.

Viktima është identifikuar si Artjol Xhelo, 32 vjeç, banues në fshatin Banaj të bashkisë Dimal. Ai ka shërbyer për disa vite në Drejtorinë Vendore të Policisë Berat, si pjesë e Forcave Operacionale “Shqiponjat”.

Sipas të dhënave, në vitin 2023 Xhelo kishte shfaqur probleme të theksuara psikologjike dhe depresive. Për këtë arsye, DVP Berat e largoi nga Forcat “Shqiponja” dhe e transferoi në Postën e Policisë Poliçan.

Gjatë kohës që shërbente në Poliçan, ish-efektivit i humbi arma e shërbimit, çka solli vendosjen e një mase disiplinore. Më pas, ai u përjashtua nga radhët e Policisë së Shtetit. Burime mediatike raportojnë se Xhelo vuante nga probleme të rënda psikologjike.

Ngjarja e rëndë u regjistrua rreth orës 14:35 të ditës së sotme, kur automjeti i tij, tip BMW, u gjet i përfshirë nga flakët në “Qafën e Llogarasë”. Trupi i pajetë i 32-vjeçarit u gjet i djegur në sediljen e shoferit.

Ndërkohë, grupi hetimor ndodhet në vendngjarje dhe po punon për zbardhjen e plotë të rrethanave. Megjithatë, dyshimet paraprake janë se Artjol Xhelo i ka vënë flakën vetes brenda automjetit të tij.