Në Orikum 350 lekë/kg, në Conad Vlorë 1075 lekë/kg

Një qytetar nga Vlora ka denoncuar një rast të fortë abuzimi me çmimet në rrjetin e supermarketeve Conad, duke sjellë prova fotografike që tregojnë diferenca drastike për të njëjtin produkt.

Sipas denoncimit të mbërritur në redaksinë e Publik.al, bëhet fjalë për ananas bio, i cili në një supermarket në Orikum tregtohet me 350 lekë/kg, ndërsa në Conad Vlorë i njëjti produkt shitet me 1075 lekë/kg. Diferenca prej më shumë se 700 lekësh për kilogram ngre pikëpyetje serioze për politikat e çmimeve dhe mbrojtjen e konsumatorit.

“Shikoni vjedhjen (se abuzim është pak për ta thënë) që Conad në Vlorë u bën qytetarëve në prag festash. I njëjti ananas, dy supermarkete të ndryshme: në Orikum 350 lekë/kg, në Conad 1075 lekë/kg. Dhe nuk është rast i izoluar – çdo produkt kushton minimumi 30% më shtrenjtë se kudo tjetër”, shprehet qytetari në mesazhin shoqërues.

Fotot e dërguara tregojnë qartë etiketat e çmimeve dhe origjinën e produktit, duke përforcuar pretendimin se nuk bëhet fjalë për varietete të ndryshme apo cilësi të ndryshme, por për të njëjtin artikull.

Pyetje që kërkojnë përgjigje

• Pse ekziston një diferencë kaq e madhe çmimi për të njëjtin produkt?
• A justifikohet kjo rritje me kosto transporti apo marzh tregtar, apo kemi të bëjmë me spekulim?
• Ku janë strukturat e mbrojtjes së konsumatorit dhe kontrollit të tregut?

Në një periudhë festash, kur kërkesa rritet dhe buxhetet familjare janë të ngarkuara, raste të tilla ushqejnë dyshimet për spekulim të hapur dhe mungesë kontrolli institucional. Publik.al u bën thirrje autoriteteve përgjegjëse të verifikojnë rastin dhe të informojnë publikun për masat që do të merren.