Gazetari ynë sot u bë dëshmitar i një skandali të përditshëm që ka marrë përmasa të turpshme në sallën e DPSHTRR-së për targimin e mjeteve dhe ndryshimin e pronësisë.
VIDEO
Pavarësisht se kishte marrë numrin përkatës dhe po respektonte radhën si çdo qytetar i ndershëm, ai mbeti i bllokuar me orë të tëra përpara sporteleve, ndërkohë që të tjerë kalonin si “VIP-a” drejt e te shërbimi. Gjatë gjithë ditës, në 20 sportele u përpunuan vetëm 183 numra, një shifër qesharake për kapacitetin e një institucioni shtetëror që duhet të jetë në funksion të qytetarit dhe jo të abuzimit.
Por e vërteta është kjo:
numrat janë një iluzion.
Radha nuk ekziston për të gjithë. Ajo vlen vetëm për ata që nuk kanë “mik”. Ndërsa qytetarët e zakonshëm presin me orë, njerëz të rekomanduar nga punonjës të sporteleve, nga informacioni, nga dera, apo nga ndonjë zyrtar i brendshëm, kalojnë radhën si të ishin pjesë e ndonjë klubi të privilegjuar.
Kjo nuk është thjesht paaftësi. Kjo është skemë abuzimi dhe përfitimi, është përçmim institucional ndaj qytetarit dhe një model i pastër i kapjes së administratës nga rrjeti klientelist i “shërbimit me mik”.
🟥 A është ky standardi i qeverisjes digjitale që propagandohet çdo ditë nga ministrat?
🟥 A është kjo “Shqipëria që duam” që kalon nëpër propaganda, ndërsa realiteti i qytetarit është turpërimi në sportele?
🟥 A ka ndonjë drejtues të DPSHTRR-së që guxon të mbajë përgjegjësi për këtë sistem të kalbur?
Të gjithë këta punonjës që “shesin sportelin” janë pjesë e një zinxhiri abuzimi që nuk mund të fshihet më. Nëse ministria përkatëse nuk ka as vullnetin dhe as integritetin të pastrojë këtë administratë nga shërbimi selektiv, atëherë jemi përballë një sistemi të instaluar për të zhgënjyer dhe rrjepur qytetarët.
🛑 Ky nuk është rast i veçuar. Është normaliteti i padrejtësisë.
Gazetari ynë nuk kërkon trajtim të veçantë, por sot mori provën që DPSHTRR nuk është një institucion për qytetarin, por një agjenci selektive për klientelën.
Ne do të vijojmë ta ndjekim këtë çështje dhe t’i shkojmë deri në fund. Sepse heshtja është bashkëfajësi.
