Drejtori Evis Berberi e ndërtuesi Ndue Kola, zhdukën provat para se të shkonte BKH

Kurrikulat e Magjistraturës, logjika e hetimit dhe praktika e botës së krimit, parashikojnë që për të fshehur gjurmët dhe provat e krimeve, autorët bëjnë krime të tjera zinxhir, deri sa krijojnë bindjen te vetja, se nuk ka mundësi për t’i zbuluar

Kështu kanë vepruar pas shembjes së rrugës Korçë-Ersekë, Drejtori i Përgjthshëm i Rrugëve, Evis Berberi, dhe ish-deputeti i PS, Ndue Kola, pronari i firmës “A.N.K Sh.p.k”, i cili po ndërton këtë rrugë, me një fond 3 herë më të lartë se kostoja reale.

Veprimi i tyre i përbashkët, për të fshehur krimin financiar e teknik të shëmbjes së kësaj rruge duke zhdukur provat, u bë më 18 shkurt 2024, duke hequr mbetjet.

Fakti është ky: Më 17 shkurt 2024, Prokuroria e Posaçme kundër Korrupsionit dhe Krimit të Organizuar, nisi hetimin dhe regjistroi procedim penal ndaj drejtorit të Autoritetit Rrugor, Evis Berberi dhe vëllezërve Kola, pronarë të firmës kontraktore “A.N.K Sh.p.k”.

Akuza e ngritur është shpërdorim dytyre, mashtrim me projektin e rrugës, mashtrim teknik, mashtrim e falsifikim me procesin e mbikëqyrjes së punimeve, kryer në bashkëpunim mes drejtorit Ervis Berberi dhe ndërtuesve Ndue e Agim Kola.

Një ditë pas nisjes procedimit penal e nisjes së hetimit, Drejtori i Përgjithshm i Rrugëve, Evis Berberi, dhe ish-deputeti i PS, Ndue Kola, pronari i firmës “A.N.K Sh.p.k”, organizuan largimin mbetjeve të rrugës së shembur Korçë-Ersekë, për të fshehur krimin e përbashkët.

Kur shkuan hetuesit e BKH te vendi i krimit në rrugën e shembur, nuk gjetën asnjë provë të mbetjeve; nëpërmjet të cilave ekspertët do zbulonin shkaqet reale të shembjes, sepse ato ishin hequr nga autorët e krimit.

Zhdukja e provave të shembjes së rrugës Korçë-Ersekë, u lejua nga Policia e Qarkut të Korçës, megjithëse me kërkesë të SPAK-ut, ishte rethuar me shirit pjesa e shembur dhe e kishte marrë në ruajtje si “Zonë krimi”.