Altin Dumani, kreu i SPAK-ut (Strukturës së Posaçme të Antikorrupsionit dhe Krimit të Organizuar), ka tashmë dy prova të reja që tregojnë për abuzimet në lidhje me aferën e inceneratorit të Tiranës dhe kontratën koncensionare për landfillin.
Për shkak të mungesës së inceneratorit, qeveria shqiptare ka paguar rreth 60 milionë dollarë koncensionarit për shërbimet e landfillimit. Kjo shifër mund të jetë edhe më e madhe, duke marrë parasysh transfertat dhe pagesat nga institucionet e tjera për inceneratorin e Tiranës.
Farudin Arapi, administratori i inceneratorit të sekuestruar në Fier, tregoi në një intervistë se për landfillin në Fier pagesa duhet të jetë 12 euro/ton, ndërsa në Tiranë është 29 euro/ton. Megjithëse të dyja janë gropa landfillimi dhe duhet të kenë të njëjtin standard, taksapaguesit shqiptarë paguajnë një diferencë prej 17 euro/ton në Tiranë. Kjo tregon një dëm ekonomik në kontratën koncensionare dhe pagesat e bëra deri më tani për inceneratorin e Tiranës.
Një fakt tjetër që provon abuzimin është se kostot parashikoheshin të ishin 25 euro/ton për inceneratorin e Fierit, ndërsa në Tiranë janë 29 euro/ton. Kjo do të thotë se edhe sikur të ishte ndërtuar inceneratori në Tiranë, tarifa për incenerim do të ishte 15% më e lartë se në Fier. Kjo rezulton në një shumë prej 10-15 milionë euro më shumë që paguhen çdo vit për inceneratorin e Tiranës se sa për atë të Fierit.
Këto fakte provojnë një dëm ekonomik të qartë dhe nxisin dyshime për një aferë korruptive në lidhje me inceneratorin dhe landfillin e Tiranës. SPAK-u ka marrë këto prova si dëshmi dhe do të vazhdojë të hetojë për të zbardhur të vërtetën rreth abuzimit me këtë çështje. Në bazë të llogaritjeve të ekspertëve, kontrata koncensionare e inceneratorit dhe landfillit të Tiranës pritet të sjellë përfitime prej 750 milionë dollarësh në vend të 430 milionë dollarëve për 30 vite, duke shkaktuar një barrë të madhe financiare për taksapaguesit dhe bizneset private.
