Elita e ferrit do shpëtojë bashkë me Maznikun sërish në Fushë, ndërsa ne do të mbytemi bashkë me anijen

Nderkohë që mediat e tenderave të pushtetit merren me arritjet e mëdha të Tiranës dhe si ajo po bëhet sot destinacioni më i rëndësishëm madje se vetë Parisi dhe Amsterdami, dhe ndërkohë që gazetat e parisë merren me lajmet e kofshëve, të gjinjve dhe të divorceve të kokave të kulturës dhe thekjen e elitave nëpër plazhet ekzotike, pagesat e kryera nga binesmeni Fusha për zëvendësin  e Veliajt  në Bashkinë e Tiranës, ish-Mjaftist-it Mazniku, janë një tjetër sinjal alarmi që përfaqesojnë Titanikun e korrupsionit, që sapo është përlasur me një tjetër ajsberg të madh në oqeanin e parasë së pisët dhe të rryshfetit, këtu në kryeqytetin e Shtetit të rënë, Tiranë. Plot 49 milion euro tendera për katër vjet, nga paratë e shqiptarëve, rreshkasin tinezisht per në Barcelonë per të marrë kthesen 900 euroshe netëve pa hënë me shate yje, tek hotelet e babëzisë, aty ku grykësia preferon të endërrojë e të flejë. Kjo është vetëm maja e ajsbergut. Të carat e mëdha të Titanic-ut shqiptar do t’i marrim vesh më vonë, kur uji të na hyjë në kabina natën kur flemë dhe vrapi i minjve të lajmerojë mbytjen e Shqipërisë. Kur anija të mbytet, ne, banorëve të klasit të minjve, do të na i mbyllin hekurat që të mbytemi bashkë me anijen, ndersa elita e ferrit do të marrë barkat e shpëtimit dhe do të shpëtojë bashkë me arsitokracinë. Ne në fund të oqeanit, ata sërish në Fushë!