Ermal Dredha, përdredh plot 2.7 milionë euro për rikonstruksionin e një kopshti

Buxheti i Bashkisë së Vlorës për vitin 2025 ka ngjallur diskutime të shumta për shkak të projekteve me kosto të lartë që priten të realizohen. Sipas të dhënave të marra nga projekt-buxheti 2025 i kësaj bashkie, 2.7 milionë euro janë parashikuar për rikonstruksionin e një kopshti, ndërsa 1.5 milionë euro do të përdoren për rehabilitimin e trotuareve të rrugës Transballkanike, të cilat aktualisht konsiderohen në gjendje të mirë.

Shpenzimet kanë ngritur pikëpyetje në lidhje me prioritetet e investimeve publike në qytet, duke u bërë objekt kritikash nga qytetarët dhe aktorë të ndryshëm lokalë. Rikonstruksioni i një kopshti me një kosto kaq të lartë është parë si disproporcional, ndërsa fondet e dedikuara për trotuaret e një rruge të konsoliduar, si Transballkanikja, kanë shtuar edhe më tej dyshimet për mënyrën e menaxhimit të buxhetit.

Ndërkohë, Bashkia ende nuk ka dhënë një deklaratë zyrtare lidhur me justifikimin e këtyre shpenzimeve, por projektet mbeten të parashikuara në planin e investimeve për vitin që vjen. Banorët e Vlorës shprehin shqetësimin e tyre mbi nevojën për prioritizimin e investimeve në projekte që ndikojnë më drejtpërdrejt në përmirësimin e cilësisë së jetës.