Fajin e ka populli

Është shumë e lehtë të fajësosh popullin për gjithçka. T’ia varësh në qafë të gjitha mëkatet, dështimet, kompromiset, pazaret e gjithçka tjetër. Ta trajtosh popullin si depo e të fusësh në barkun e tij të gjitha veset e kujtdo që është mbi popullin.

Në çdo shoqëri ka një shtresë trunore e cila shkruan për fenomenet e ndryshme të një shoqërie. Palca trunore e shoqërisë i jep një këndvështrim ndryshe shoqërisë mbi fenomene të caktuara, që orvaten të serviren si normalitet, por që në të vërtetë janë të dëmshme për një shoqëri e mbi të gjitha për pjesën më të prekshme të saj, për rininë.

Është alibi e rehatshme të shash popullin, nga kolltuku i rehatshëm i opinionistit ” në Love Story” , sikundër është shfaqje hipokrizie të flasësh për vlerën e familjes, pasi je dystuar te kolltuku i majmë i ” Përputhen”.

Është alibi e rehatshme të shash popullin, kur si gazetar apo si psikolog nuk i kushton një shkrim formateve televizive infektuese apo problemeve sociale në këtë vend. Rehatohesh nën sloganin ” Mos shqetësoni udhëheqjen rilindase” dhe çdo shkrim është në përputhje me propagandën rilindase.

Është alibi e rehatshme të shash popullin kur qëndron krejt krenare pranë Veliajt duke mbjellë pemë pēr pyllin orbital imagjinar të kryebashkiakut, në emër të projektit të radhës në bashki.

Është alibi e rehatshme të shash popullin, kur si deputet/e e opozitës ke marrë votat e popullit, por fjalën në parlament për t’u dhënë zë halleve të popullit nuk e merr kurrë.

Është alibi e rehatshme të shash popullin dhe ta etiketosh si popull injorant dhe të paditur kur si akademik nuk thua gjysmë fjale për gjendjen e arsimit në vend.

Është alibi e rehatshme të shash popullin, kur si arkitekt nuk thua gjysmë fjale për masakrën urbane në kryeqytet.

E pra, fajin nuk e ka populli. Mund ta përsërisësh sa herë të duash nga kolltuku i rehatshëm i kompromisit me dyshen Rama& Veliaj, por përsëritja e një pohimi nuk e bën këtë të fundit detyrimisht të vërtetë.

Post Scriptum- Faji i popullit është kompromisi yt me Rilindjen.