Hierarkia e mediokritetit

Në shoqëritë e zhvilluara ekziston ajo çka quhet hierarkia e vlerave dhe është pikërisht kjo hierarki që mban në shina një shoqëri.

Në Shqipërinë tonë të vogël për nga sipërfaqja, por të madhe për nga ngjarjet, ekziston veçse hierarkia e mediokritetit. Mediokër në gjithçka, madje edhe në mediokritet janë mediokër.

Mjafton t’i hedhësh një sy shkresës që ka dalë nga Institucioni i Presidencës lidhur me shkarkimin e Edvin Shvarcit dhe do të dallosh që në krye të shkresës gabimet drejtshkrimore. Se sa i drejtë dhe i mirëmenduar ka qenë ky vendim, e dëshmon cilësia e shqipes me të cilën është gërmëzuar mbi fletën e bardhë ky i fundit.

Pas 19 vitesh punë në Institucionin e Presidencës Edvin Shvarc, djali i përkthyesit Robert Shvarc, shkarkohet nga detyra.

Post Scriptum- Institucionin e Presidencës e ftojmë të vendosë marrëdhënie me gjuhën shqipe, në mënyrë që kur të shkarkojë intelektualin e radhës për të rekrutuar mediokrin e radhës, ta shkruajë si duhet vendimin në fletën e bardhë që nxin nga mediokriteti.