Historia e trishtë e Armelës : Nuk je vetëm, mami!

Motra e dy vëllezërve të arrestuar për vrasje: “Tentova vetëvrasjen, por vajza ime më shpëtoi”

Armela Hasaj, e motra e Arjon dhe Klisman Hasajt, të arrestuar për vrasjen e Ramazan Mataj në fillim të janarit, ka thyer heshtjen duke rrëfyer një histori tronditëse të abuzimit dhe kërcënimeve që, sipas saj, e shtynë drejt një spiraleje frike dhe dhimbjeje.

Në një intervistë ekskluzive për “Shqipëria Live”, Armela zbuloi detaje rrëqethëse mbi raportin e saj me viktimën, duke deklaruar se ishte kërcënuar dhe shantazhuar vazhdimisht prej tij. Ajo pretendon se viktima i dërgonte foto me armë pranë banesës së saj, duke e detyruar të vazhdonte kontaktet me të.

“Më vinte te dera e shtëpisë me armë në dorë. Nuk dilja përjashta nga frika. Dilja vetëm me mamin ose me dikë tjetër. Edhe pas martesës së dytë, ai më gjente dhe vinte tek shtëpia e burrit tim.”

Armela rrëfen se situata kishte shkuar aq larg, sa viktima kishte kërcënuar edhe motrat e saj. “I kërkonte motrat e mia. I thoja: ‘Ke punë me mua, jo me familjen time.’ Nuk dija ç’të bëja. Të gjitha provat i kam pasur në telefonin që më mori ai. Nuk ia tregova askujt. Më vinte turp.”

Braktisja dhe tentativa për vetëvrasje

Armela pranoi se prej katër vitesh jeton e izoluar dhe e braktisur nga familja. Gjendja e saj psikologjike ishte rënduar aq shumë, sa kishte tentuar të vriste veten.

“Vajza ime 5-vjeçare më shpëtoi. Më tha: ‘Mami, nuk je vetëm.’ Ajo më dha forcë të vazhdoj për të jetuar, edhe pse çdo ditë ndjej peshën e fajit.”

Ajo shtoi se ndjen përgjegjësi për atë që ka ndodhur dhe kërkoi falje publike ndaj familjes së saj. “Dua t’i shoh të gjithë mirë dhe të lirë. Vajzën time nuk e kanë takuar kurrë që kur ka qenë shumë e vogël. Nuk dua që ata të vuajnë për shkak timin.”

Një dramë njerëzore që ngre pikëpyetje të mëdha

Dëshmia e Armelës Hasaj nxjerr në pah një histori komplekse, ku dhuna, frika dhe presioni psikologjik duket se kanë luajtur një rol kyç në rrjedhën e ngjarjeve. Ajo shtron pyetje mbi mbrojtjen që institucionet u ofrojnë grave që përballen me kërcënime të tilla dhe mbi mundësitë që ato kanë për të shpëtuar nga spiralet e dhunës.

Kjo histori tronditëse është një tjetër thirrje për ndërgjegjësim dhe veprim kundër dhunës dhe abuzimit që shumë gra përjetojnë në heshtje.