Helikopteri i Presidentit Raisi u dogj plotësisht në aksident…

Presidenti i Iranit, Ebrahim Raisi ka humbur jetën në një aksident me helikopter, konfirmojnë mediat shtetërore.

Kanë dalë pamjet nga vendi ku humbi jetën tragjikisht presidenti i Iranit, Ebrahim Raisi, ministri i Jashtëm, Hossein Amir-Abdollahian dhe personat e tjerë në bord.

Pamjet me dron tregojnë rrënojat e helikopterit të Presidentit Raisi. Në videon e publikuar nga Gjysmëhëna e Kuqe, shihet bishti i helikopterit pranë një pjese toke të djegur në një kodër.

Ekipet e shpëtimit deklaruan se nga aksidenti nuk ka pasur asnjë të mbijetuar.

“Helikopteri i Presidentit Raisi u dogj plotësisht në aksident… për fat të keq, të gjithë pasagjerët dyshohet se kanë vdekur”, tha zyrtari.

Ministri i Jashtëm Hossein Amir-Abdollahian gjtihashtu ka humbur jetën në këtë aksident.

Më herët shpëtimtarët që arritën në vendin e rrëzimit të helikopterit në Iranin veriperëndimor thanë se nuk kishte “asnjë shenjë jete”.

Raisi po shkonte për në qytetin e Tabrizit, në veriperëndim të Iranit, pasi u kthye nga një zonë kufitare Iran-Azerbajxhan, sipas mediave lokale.

Incidenti shkaktoi një operacion masiv kërkimi që u pengua nga kushtet e këqija të motit.

Vdekja e tij vjen në një moment të vështirë në Lindjen e Mesme, me luftën e ndezur në Gaza. Helikopteri u rrëzua disa javë pasi Irani nisi një sulm me dron dhe raketa ndaj Izraelit në përgjigje të një sulmi vdekjeprurës në trupën e tij diplomatike në Damask.

Raisi u bë president në një zgjedhje historikisht jokonkurruese në vitin 2021. Më parë kryetar i drejtësisë, ai ka mbikëqyrur një periudhë të represionit të intensifikuar të mospajtimit në një komb të tronditur nga protestat e udhëhequra nga të rinjtë kundër sundimit klerik.

Raisi ishte personi i dytë më i fuqishëm në strukturën politike të Republikës Islamike pas Udhëheqësit Suprem Ayatollah Ali Khomeini. Kushtetuta iraniane urdhëron që, në rast të vdekjes së presidentit, zëvendëspresidenti i parë do të marrë detyrën me miratimin e Udhëheqësit Suprem.