I dënuar por menaxhonte tokat e Himarës! Kush është kushëriri i ish-gruas së Edi Ramës, Jerasimo Bashi

Jerasimo Bashi është dënuar dhe në Greqi për trafik droge, ndërsa drejtor është emëruar me dëshmi penale false, me 3 diploma false e me status të nëpunësit civil fals…

Për tokën e resortit të Olta Xhaçkës, SPAK dhe Gjykata e Posaçme, kanë vendosur masë arresti edhe për Jerasimo Bashin, Drejtor i Menaxhimit të Tokave në Bashkinë e Himarës, por ai u arratis 2 ditë para urdhër arrestit, ngaqë ka lidhje gjaku amësore me djalin e Edi Ramës, por dhe me Edi Ramën për pazaret e tokave në Himarë.

Jerasimo Bashi është kushëriri i parë, i ish-gruas së parë të Edi Ramës; dhe ishte ky, që e emëroi Drejtor të Mbrojtjes e Menaxhimit të Tokës në Bashkinë e Himarës.

Ata që dinë të vërtetën e batërdisë më tokat, thonë se Edi Rama e emëroi kushëririn e ish-gruas, ose më saktë ish-kunatin; për ta pasur garant të zbatimit të pazareve me tokat, por dhe si “çimkë” brenda Bashkisë së Himarës, për të mësuar se çfarë bëhej atje jashtë dijenisë e skemave të tij.

Drejtori ish-kunat i Edi Ramës, ishte kryetari faktik i Bashkisë së Himarës dhe vendoste e kryente veprime me tokat, pa e përfillur fare Jorgo Goron, madje e urdhëronte atë, administratën e Këshillin Bashkiak, të firmosnin e miratonin çdo pazar të tij me tokat, trojet, plazhet, madje dhe me lejet e ndërtimit, ndërtimet pa leje, kontratat e qirave e tenderët.

Kjo e vërtetë, është dhe te deklarata e Jorgo Goros para prokurorëve të SPAK, ku thotë, se ka firmosur verbalisht çdo projekt-vendim të paraqitur nga Drejtori i Mbrojtjes e Menaxhimit të Tokave në Bashkinë e Himarës, Jerasimo Bashi dhe bashkëpunëtorët e tij.

Ndërsa SPAK, kërkoi masë “Arrest shtëpie” për ish-kunatin e Edi Ramës, drejtorin Jerasimo Bashi, konfirmuar si koka e bandës bashkiake të Himarës, që ka bërë batërdinë me tokat nga Himara deri në Borsh, Lukovë, Piqeras, Shënvasil e Kakome, madje u njoftua të arratisej.

Ka dhe një skandal tjetër në emërimin e tij drejtor: Sipas urdhrit të Drejtorisë së Administratës Publike në muajin mars 2016, Jerasimo Bashit i ndalohej përgjithnjë, punësimi dhe emërimi në poste të administratës publike, për vepra e dënime penale.

Por krye bashkiaku Jorgo Goro e emëroi të dënuarin Jerasimo Bashi, Drejtor të Mbrojtjes e Menaxhimit të Tokave në Bashkinë e Himarës, në shkelje të ligjit për dekriminalizimin, duke zbatuar urdhrin e Edi Ramës.

Jerasimo Bashi ka dhe një dënim në Greqi për trafik droge, ndërsa Drejtor i Tokave në Bashkinë e Himarës është emëruar me dëshmi penale false, me 3 diploma false e me status të nëpunësit civil fals.

Por Edi Rama e katapultoi drejtor të tokave në Bashkinë e Himarës, ndërsa kushërirën e tij Blerina Bala nga Vunoi, Babloku e ka emëruar zv/kryetare Bashkie për lejet e ndërtimit dhe tapitë e tokave, të cilën siç thuhet, i ka dhënë urdhër këshilltarëve të Bashkisë Himarë, ta emërojnë kryetare në vend të Jorgo Goros.