Simboli kontradiktor i rrugës drejt BE-së

Ivo Sanader, ish-kryeministri i Kroacisë dhe një nga figurat më të diskutuara politike të rajonit, ka lënë sot qelinë e burgut. Ai drejtoi Kroacinë në periudhën 2003–2009 dhe konsiderohet si një nga arkitektët kryesorë të afrimit të vendit me Bashkimin Europian

Sanader u dënua me disa vite burg për korrupsion dhe shpërdorim detyre, në një sërë çështjesh të bujshme që përfshinin marrëveshje të dyshimta me kompani energjetike dhe përfitime personale nga kontrata shtetërore. Ndër to, çështja më e njohur ishte ajo e “INA-MOL”, ku Sanader u akuzua se kishte marrë rryshfet për t’i dhënë kontrollin mbi kompaninë shtetërore të energjisë INA, gjigantit hungarez MOL.

Gjykatat kroate e shpallën fajtor në disa raste, duke e kthyer atë në simbolin e parë të një lideri të lartë ballkanik të dënuar për korrupsion në kuadër të reformave drejt anëtarësimit në BE.

Lirimi i tij shënon një kthesë të fortë simbolike për Kroacinë, vend që tashmë është anëtar me të drejta të plota i Bashkimit Europian, por që ka kaluar një proces të gjatë dhe të dhimbshëm të pastrimit të elitave politike dhe të forcimit të drejtësisë.

Megjithëse ai ka kryer pjesën më të madhe të dënimit, debati publik në Kroaci për trashëgiminë politike dhe morale të Sanader mbetet i ndezur. Ai njihet ende si lideri që e çoi Kroacinë drejt Brukselit, por edhe si shembulli i një pushteti që abuzoi rëndë me besimin publik.