Ishte vjedhur në Gjermani, sekuestrohet BMW luksoze në Vorë

Policia e Shtetit ka zbuluar dhe goditur një tjetër rast të trafikimit të automjeteve luksoze të vjedhura jashtë vendit, duke sekuestruar një BMW M-8 me vlerë rreth 140 mijë euro, i cili rezultoi i vjedhur në Gjermani.

Automjeti u ndalua në zonën e Vorës, ndërsa në drejtimin e tij ndodhej shtetasi E. D., 39 vjeç, i cili dyshohet se e kishte blerë mjetin e trafikuar. Ai është proceduar penalisht nga strukturat policore.

Nga hetimet e kryera në kuadër të operacionit të koduar “Stolen Line”, policia ka identifikuar edhe autorin e dyshuar të trafikimit. Bëhet fjalë për shtetasin kosovar F. H., 42 vjeç, i cili dyshohet se ka futur automjetin në Shqipëri me qëllim shitjen. Ky i fundit është shpallur në kërkim dhe vijon puna për kapjen e tij.

Sipas njoftimit zyrtar, specialistët e Seksionit për Hetimin e Trafiqeve të Paligjshme po intensifikojnë veprimet hetimore për zbardhjen e plotë të rastit dhe dokumentimin e rasteve të tjera të ngjashme.

Materialet procedurale i janë referuar Prokurorisë së Tiranës, për veprime të mëtejshme ligjore, nën akuzën e “Trafikimit të mjeteve motorike”.