Kancelari Scholz : Kurti dhe Vuçiç thanë se propozimet konkrete do të zbatohen, ky është hap i rëndësishëm

Kancelari gjerman Olaf Scholz ka folur sot për bisedimet e një dite më parë me kryeministrin e Kosovës Albin Kurti dhe presidentin serb Aleksandër Vuçiç, për dialogun mes dy vendeve.

Scholz tha se nuk e ndanë vlerësimin se ato kanë dështuar, ndërsa theksoi se Kurti dhe Vuciç e kanë thënë se marrëveshjet do të zbatohen.

“Në këtë situatë vërtetë pikëlluese ishim në gjendje të ecim përpara. Nuk e ndaj vlerësimin tuaj. Por mendoj se nëse e bëjmë një vlerësim politik, besoj se mund të ndahet vlerësimi im se zoti Kurti dhe z. Vuçiq thanë që propozimet konkrete, Marrëveshja e Ohrit dhe Asociacioni i Komunave me Shumicë Serbe do të implementohen. Këtë ata e thanë qartë. Ky është një hap i rëndësishëm dhe duam ta shohim të ndodhë” ka theksuar Scholz.

Nga ana tjetër, shefi i Politikës së Jashtme, Josep Borrell, i cili ndërmjetëson bisedimet për normalizimin e marrëdhënieve Kosovë-Serbi, tha se “parakushtet e njërës palë kanë qenë të papranueshme për tjetrën” dhe se kjo e ka pamundësuar marrëveshjen.

Në tryezë të diskutimeve ka qenë zbatimi i Marrëveshjes Bazë, si dhe një propozim i ri për statutin e Asociacionit të komunave me shumicë serbe në Kosovë, i cili është prezantuar në Prishtinë dhe në Beograd nga diplomacia perëndimore, më 21 tetor.

Në adresime të ndara, Kurti ka thënë se ka qenë i gatshëm ta nënshkruajë edhe Marrëveshjen Bazë, edhe draftin e ofruar për Asociacionin, ndërsa Vuçiç ka këmbëngulur në zbatimin e “asaj që është nënshkruar”.