Kërcënimet e xhaxhait të vrasësit të gjykatësit: Do t’ju hedh në erë!

Pas vrasjes së gjyqtarit Astrit Kalaja më 6 tetor 2025 në ambientet e Gjykatës së Apelit në Tiranë, kanë dalë në dritë detaje të reja lidhur me konfliktin që çoi në këtë ngjarje tragjike.

Xhaxhai i autorit të dyshuar, Elvis Shkambi, Gjon Shkambi, kishte paralajmëruar prej kohësh tensione për një pronë dhe madje në një debat televiziv të zhvilluar një vit më parë, ai kërcënoi hapur me dhunë. Gjatë emisionit, Shkambi deklaroi:

“Ja gjej unë formën si me e liru. Si ta minoj në katër qoshet se është prona ime. E kam me certifikatë. Të gjithë do t’ju hedh në erë. Po ju paralajmëroj, të gjithë do t’ju hedh në erë.”

Bëhet fjalë për një godinë në lagjen “Skënderbeg” në Shkodër, e njohur si ish-Shkolla e Rezervave, ku Shkambi pretendonte pronësinë dhe ku sipas tij, janë kryer veprime të paligjshme.

Një vit më pas, nipi i tij, Elvis Shkambi, 30 vjeç, vrau me armë gjyqtarin Kalaja brenda sallës së gjyqit, pasi ky kishte dhënë një vendim që nuk përputhej me kërkesat e xhaxhait të tij. Ai plagosi gjithashtu Ragip Kurtajn dhe djalin e tij, Ervis Kurtajn, palët e tjera në proces.

Pas ngjarjes, Shkambi u dorëzua pa rezistencë pranë policisë që ndodhej jashtë gjykatës.