KLSH: Pajisjet mjekësore tek Onkologjiku, jo funksionale, 600 gra të rrezikuara

Një audit i Kontrollit të Lartë të Shtetit për periudhën 2020-2022 ka dalë në përfundimin se pacientët me tumor nuk marrin shërbimin e duhur në Qendrën Spitalore Universitare “Nënë Tereza” duke rrezikuar edhe jetën e tyre.

Në këtë raport, audituesit kanë vënë re disa prej shkeljeve që lidhen me mosfunksionimin e pajisjeve në spitalin Onkologjik.

Sipas raportit të KLSH, në spitalin Onkologjik nuk është funksionale pajisja mjekësore e Brakiterapi (Kyriterapi). Mosfunksionimi i kësaj pajisje ka bërë që 600 gra të prekura nga kanceri gjinekologjik të mos trajtohen me radioterapi, sepse mungon pajisja e Brakiterapisë.

Më tej në raport thuhet se mungesa e aparatit të Ortovoltazhit ka sjellë mostrajtimin e 200 pacientëve me radioterapi që vuajnë nga tumoret e lëkurës. (Melanoma).

Pjesë nga raporti:

Drejtoria e Përgjithshme e Qendrës Spitalore Universitare Tiranë, “Nënë Tereza” nuk ka arritur në kohë për sigurimin e elementëve “Tubusa, Pompa dhe Maska termo plastike) duke mos ofruar shërbim për 250 pacientë me shërbim radioterapi në Spitalin Onkologjik.

Në spital mungon sistemi i kondicionimit, dhomat e pacientëve të katit të lll kanë prani të lagështirës si edhe kati nëntokë i godinës se është jofunksional i cili aktualisht shërben si një vend grumbullimi për pajisjet e amortizuara. Niveli i papastërtisë në katin nëntokë është mjaft i lartë dhe përbën risk potencial për infektime.

Mos sigurimi i pajisjes mjekësore të Braniterapisë të disa elementëve (Tubusa, Pompa dhe Maska termo plastike), mosrehabilitimi i ambienteve për përshtatjen e vendosjes së pajisjes së Ortovoltazhit si dhe mostrajtimi në kohë i pacientëve që kanë nevojë për to, tregon se shërbimi i spitali Onkologjik në trajtimin e sëmundjeve tumorave (për periudhën në auditim), nuk ka efektivitet të plotë,.

Sakaq kërkohet që Drejtoria e Përgjithshme e Qendrës Spitalore Universitare Tiranë “Nënë Tereza” në bashkëpunim me Polin e Administrimit të Integruar të Spitalit Onkologjik, të marrin masa për sigurimin e pajisjeve të Brankiterapisë, të elementëve (Tubusa, Pompa dhe Maska termo plastike) si edhe rehabilitimin e ambienteve për vendosjen e aparatit të Ortovoltazhit për trajtimin e pacientëve me sëmundjet tumorale.