Albert Mero

Altin Dumani është paraqitur nga propaganda si njeriu i pakorruptuar që po pastron Shqipërinë nga krimi dhe korrupsioni. Por të dhënat e publikuara nga emisioni investigativ Plug në SYRI TV tregojnë një histori tërësisht ndryshe: një histori të një individi që ka ndërtuar karrierën e tij mbi shkelje ligjore, lidhje politike dhe një veting të dyshimtë.

Një Emërim i Paligjshëm që E Përcaktoi Karrierën

Si është e mundur që një student i sapodiplomuar të emërohet në krye të një prokurorie të rëndësishme si ajo e Tropojës? Ligji i kohës kërkonte të paktën tre vite eksperiencë për të drejtuar një prokurori, por për Altin Dumanin, ky rregull nuk vlejti. Ai u emërua direkt nga Arben Rakipi, në atë kohë Kryeprokuror i Shqipërisë, dhe sot drejtues i Shkollës së Magjistraturës. E njëjta magjistraturë që po “furnizon” sistemin e drejtësisë me të ashtuquajturit të reformuar, por që në fakt janë pjesë e të njëjtit rrjet të kapjes së drejtësisë.

Kjo lidhje e hershme me Rakipin e ka ndjekur Dumanin gjatë gjithë karrierës së tij dhe e ka vendosur atë në qendër të një strukture ku drejtësia nuk zbatohet, por manipulohet sipas interesave të pushtetit.

Vetingu i Dumanit një formalitet i manipuluar

Procesi i vetingut u shit si garanci për pastrimin e drejtësisë, por rasti i Altin Dumanit e tregon qartë se në Shqipëri, vetingu është përdorur si mjet për të selektuar dhe vendosur njerëzit e duhur në sistem, jo për të ndëshkuar të korruptuarit.

Si mund të përfundojë një proces kaq i rëndësishëm në më pak se 10 ditë? Tre ditë pas marrjes së dosjes, Dumani dorëzon dokumentet, dhe brenda 24 orësh, Komisioni i Posaçëm i Vetingut (KPK) cakton seancën dëgjimore dhe jep vendimin final! Çfarë vetingu është ky? Ky është një proces i inskenuar, ku gjithçka ishte e paracaktuar.

Për më tepër, vetingu i Dumanit u krye nga Roland Ilia, një emër i lidhur ngushtë me Erion Veliajn dhe lëvizjen G99, një tjetër sinjal se drejtësia nuk ka qenë kurrë e pavarur nga politika.

Pasuria e pashpjegueshme e Altin Dumanit

Kur Dumani hyri në sistemin e drejtësisë në vitin 1999, ai nuk kishte asnjë pasuri të deklaruar. Por sot, ai ka dy apartamente, një dyqan dhe një vilë ku jeton, e cila ndodhet në emër të vjehrrit të tij. E gjithë kjo pasuri është fituar përmes transaksioneve të dyshimta dhe blerjeve me vlera që nuk justifikohen me të ardhurat e tij.

Një rast i qartë është blerja e apartamentit 127 m² në vitin 2006 për vetëm 50 mijë euro, një çmim shumë më i ulët se vlera reale e tregut në atë kohë. Dumani pretendon se ka paguar 9 mijë euro “cash” dhe pjesën tjetër me kredi, por kjo nuk shpjegon as burimin e këtyre parave dhe as faktin se ai jetonte në këtë apartament dy vite para se ta blinte.

Po ashtu, Komisioni i Posaçëm i Vetingut nuk hetoi fare për vilën ku banon Dumani, e cila është në emër të vjehrrit të tij, që pretendon se e ka marrë dhuratë nga një pastor anglez. Në çdo rast tjetër, një deklaratë e tillë do të ishte subjekt hetimi, por për Dumanin, çdo gjë është anashkaluar.

Soros dhe kapja e drejtësisë nga Rrjeti i Rilindjes

Një tjetër element shqetësues në këtë histori është lidhja e Altin Dumanit me rrjetin e Sorosit dhe qeverinë Rama. Këshilltari i tij, Fabian Zhilla, ka ndjekur të gjithë karrierën akademike dhe profesionale me financime nga Sorosi dhe është një nga njerëzit më të afërt të Besfort Lamallarit, një nga figurat më të rëndësishme të Ministrisë së Brendshme.

Kjo lidhje tregon se SPAK nuk është një institucion i pavarur, por një instrument në duart e Edi Ramës dhe rrjetit të tij ndërkombëtar. Me ndihmën e Sorosit, drejtësia në Shqipëri është kthyer në një mjet politik për të goditur kundërshtarët dhe për të mbrojtur të korruptuarit e pushtetit.

Drejtësia që nuk prek të fortët

Ndërkohë që SPAK arreston figura të opozitës dhe godet njerëzit që i dalin kundër qeverisë, askush nuk prek aferat e mëdha të qeverisë “Rama”. Askush nuk heton Erion Veliajn për skandalet e inceneratorëve apo për mënyrën se si është pasuruar. Askush nuk heton tenderat e dyshimtë të ministrave të Rilindjes. Askush nuk pyet se ku përfunduan qindra milionë euro të zhdukura nga fondet publike.

Sepse në Shqipërinë e kapur, drejtësia nuk është për të gjithë. Është për të mbajtur pushtetin në duart e atyre që e kontrollojnë. Dhe Altin Dumani është produkti më i pastër i këtij sistemi.

Historia e Altin Dumanit nuk është vetëm një histori e një individi që ka arritur majat e drejtësisë përmes shkeljesh dhe manipulimesh. Është një dëshmi e qartë se drejtësia në Shqipëri nuk është reformuar, por është kapur në mënyrë më të sofistikuar.

Me njerëz si Dumani në krye të institucioneve më të rëndësishme të drejtësisë, Shqipëria nuk ka për të parë kurrë një sistem të vërtetë të pavarur. Në vend të një SPAK-u të fortë dhe të paanshëm, kemi një SPAK të kontrolluar nga qeveria, që godet opozitën dhe mbron të korruptuarit e pushtetit.

Ky është realiteti i “reformës në drejtësi”. Një reformë që nuk solli drejtësi, por një instrument të ri për mbajtjen e pushtetit me çdo kusht. Dhe Altin Dumani është simboli i saj.