Lufta/ Zyrtari i OKB-së: Afro 680 mijë qytetarë janë larguar nga Ukraina! Apel donatorëve për 1.7 miliardë dollarë në ndihmë të refugjatëve

Afro 680 mijë qytetarë ukrainas janë larguar nga vendi i tyre që prej nisjes së ofensivës ruse. Këtë e ka konfirmuar kreu i Agjencisë së Refugjatëve në OKB, Filippo Grandi, i cili shton se numri i qytetarëve që kërkojnë evakuimin po rritet me shpejtësi.

Në projeksionet e bëra nga kjo agjenci, mbi 4 milionë refugjatë ukrainas do të largohen nga vendi i tyre dhe do të kërkojnë mbrojtje nga shtetet fqinje.

Sipas Grandi-t, kjo do të sillte dhe krizën më të madhe të emigrantëve në Europë për këtë shekull.

“Numri i qytetarëve që janë larguar nga Ukraina drejt shteteve fqinje ka arritur në 677 mijë. Agjencitë humanitare të OKB-së dhe Organizatat Jofitimprurëse u kanë bërë apel donatorëve për mbledhjen e 1.7 miliardëve dollarë për të mbështetur refugjatët të largohen nga Ukraina” – shkruan Grandi në Twitter.