Maroku eliminon Holandën pas penalltive

Maroku është kualifikuar në fazën e 1/8-ave të Kupës së Botës 2026, pasi mposhti Holandën me rezultatin 3-2 pas penalltive. Koha e rregullt dhe shtesa përfunduan në barazim 1-1 në ‘Estadio Monterrey’.

Ndeshja nisi me ritëm të lartë dhe duele të forta fizike, ndërsa të dyja skuadrat krijuan raste të mira. Portieri holandez Bart Verbruggen u shndërrua në protagonist në pjesën e parë, duke ndalur fillimisht një goditje me kokë të Neil El Aynaoui-t dhe më pas një goditje të fuqishme të Achraf Hakimit.

Maroku ishte skuadra më e rrezikshme edhe pas pushimit, me Hakimin që goditi traversën, ndërsa Holanda e pati të vështirë të depërtonte në mbrojtjen kundërshtare.

Në minutën e 71-të, holandezët kaluan në epërsi. Zëvendësuesi Wout Weghorst devijoi topin për Crysencio Summerville, i cili shërbeu për Cody Gakpo-në. Sulmuesi nuk gaboi dhe dërgoi topin në rrjetë për 1-0.

Holandë – Marok 1-0

Megjithatë, Maroku nuk u dorëzua. Në minutat shtesë të kohës së rregullt, një krosim i shkëlqyer i Chemsdine Talbi u shfrytëzua në mënyrë perfekte nga Issa Diop, i cili me kokë barazoi rezultatin dhe e çoi ndeshjen në shtesa.

Holandë – Marok 1-1

dhe në 30 minutat shtesë pati emocione të mëdha. Verbruggen realizoi një nga pritjet më spektakolare të turneut, duke ndalur nga afër goditjen e Soufiane Rahimi-t dhe duke mbajtur në lojë Holandën.

Fituesi u vendos nga penalltitë, ku marokenët treguan më shumë qetësi. Pasi Neil El Aynaoui humbi goditjen e parë, Holanda nuk arriti ta shfrytëzonte avantazhin. Justin Kluivert goditi shtyllën, ndërsa më pas gabuan edhe Quinten Timber dhe Summerville, ky i fundit u ndal nga portieri Yassine Bounou.

Edhe Hakimi humbi një penallti për Marokun, por në fund ishte Ismael Saibari ai që shënoi goditjen vendimtare, duke vulosur kualifikimin historik të “Luanëve të Atlasit”.