Messi dëshiron të kthehet te Barcelona

Lionel Messi ka fituar çdo trofe të mundshëm në çdo skuadër ku ka marrë pjesë dhe sidomos pas Kupës së Botës ndihet shumë i plotësuar për sa i përket sukseseve në karrierë.

Viti i shkuar do të mbahet mend gjatë nga ai dhe e gjithë bota, pasi me triumfin në Kupën e Botës, ai u ul në fron bashkë me legjenda si Maradona dhe Pele.

Gjithsesi, emocionalisht ai nuk ndihet mirë në Paris. Leo prej shumë vitesh ishte mësuar me dashurinë e madhe të Barcelonës, por në Francë nuk ka gjetur atë ngrohtësi.

Kontrata e tij përfundon në verë dhe argjentinasi ende nuk e ka marrë vendimin për të ardhmen. Para pak muajsh babai i “Pleshtit” u shpreh se nuk do të kthehet te Barcelona, por situata duket se ka ndryshuar.

“Radio Catalunya” raporton se Messi po e mendon seriozisht një rikthim për një “kërcim të fundit” në “Camp Nou”, nga ku u largua pa dashurinë e tifozëve dhe në një mënyrë që nuk i kishte aspak hije një legjende si ai.

Argjentinasi do të ishte gati të sakrifikonte nga paga e tij për të ndjerë edhe një herë ngrohtësinë e katalanasve dhe për të plotësuar dëshirën e tij, që të ndiejë edhe një herë dashurinë, që i mungoi kur u largua.