Napoli-Juventus, kështu do të luajnë dy ekipet në supersfidën e Serie A

Juventusi humbet sulmuesin Mario Mandzukic dhe mbrojtësin Howedes në seancën e fundit stërvitore një ditë para sfidës me Napolin.

Të dy lojtarët në fjalë kanë shfaqur probleme muskulore e për rrjedhojë nuk janë përfshirë në listën e të grumbulluarve nga Allegri.

Në konferencën për shtyp trajneri bardhezi la të kuptohet se dyshimet e tij i përkisnin sulmit, me Gonzalo Higuain që po bën të pamundurën për të dhënë kontribut kundër ish-skuadrës së tij, edhe pse vetëm pak ditë më parë iu nënshtrua një ndërhyrjeje kirurgjikale në dorë.

Mirëpo telashet janë shtuar me dëmtimin e Mandzukicit. Trajneri bardhezi detyrohet të kalojë nga rreshtimi 4-2-3-1 në 3-4-2-1. Në mbrojtje do të vendosen Benatia, Barzagli dhe Chiellini.

De Sciglio dhe Alex Sandro do të jenë më të avancuar në krahët e mesfushës, ku në qendër mbetet dyshja Pjanic-Khedira, ndërsa Dybala dhe Douglas Costa do të jenë në mbështetje të të avancuarit Gonzalo Higuain. Në këtë rast i sakrifikuari është Cuadrado.

Dilema e vetme në kampin napolitan i përket krahut të majtë të mbrojtjes, ku Mario Rui është më i avantazhuar për të luajtur titullar.

Hysaj, si gjithmonë, i padiskutueshëm në të djathtë, ndërsa në qendër Albiol-Koulibaly.

Hamsik, Jorginho dhe Allan në mesfushë, ndërsa në sulm, në rreshtimin 4-3-3, do të jenë Callejon, Mertens dhe Insigne.