Ndërron jetë i paraburgosuri në Shkodër

Një ngjarje e rëndë është regjistruar në Institucionin e Ekzekutimit të Vendimeve Penale në Shkodër, ku një i paraburgosur ka humbur jetën në orët e para të mëngjesit të kësaj të diele.

Sipas të dhënave zyrtare, bëhet fjalë për shtetasin me inicialet Ç. J., 62 vjeç, i cili ndodhej në të njëjtën dhomë me të birin, të burgosurin me inicialet D. J. Mësohet se ai ka pësuar një përkeqësim të menjëhershëm të gjendjes shëndetësore, duke detyruar ndërhyrjen e menjëhershme të personelit mjekësor të institucionit.

Pas dhënies së ndihmës së parë, për shkak të gjendjes së rënduar, u vendos transportimi i tij me urgjencë drejt Spitalit të Koplikut. Pavarësisht përpjekjeve të stafit mjekësor dhe procedurave të reanimimit kardiorespirator gjatë transportit dhe në ambientet e urgjencës, 62-vjeçari nuk arriti të mbijetojë, duke u shpallur i vdekur nga mjekët.

Drejtoria e Përgjithshme e Burgjeve bëri me dije se menjëherë pas ngjarjes janë njoftuar organet kompetente, të cilat kanë nisur hetimet për të dokumentuar plotësisht rastin dhe për të sqaruar shkaqet e vdekjes.

Në reagimin zyrtar, institucioni shprehu ngushëllimet për familjen e të ndjerit dhe garantoi bashkëpunim të plotë me autoritetet e drejtësisë për zbardhjen e plotë të kësaj ngjarjeje.