NUK mbijetojmë dot nëse (duke u përshtatur) imitojmë kafshët….

Përditësuar më 22 May 2018, 13:46

Kur akomodohesh në një cep të halesë, nuk të bëjnë më përshtypje as produktet e saj. Çdo gjë duket normale. Ashtu si nuk të bëjnë më përshtypje fenomene të tilla ku qytetarët u kërkojnë ndihmë kukuvajkave.

E ku qenka problemi?
Shyqyr që janë dhe këto portale-dëgjon si replikë.
Fiks!
Të ndrydhur, njerëzit do pranojnë çdo gjë si normale duke u zhytur në banalitet. Habitati i duhur për çdo regjim despotik.

28 vjet pa shtet janë më se të mjaftueshme për “tu mësuar” dhe pa të. Njerëzit nuk i drejtohen më institucioneve të Republikës (si Gjykatat apo Avokati i Popullit a organeve adm.të garancisë) për të zgjidhur konfliktet e garantuar të drejtat.

Ato janë të zaptuara nga një hordhi barbare, të cilat shtojnë e nuk zgjidhin halle.
Përballë kësaj shqiptarit i duhet veç “të mësohet”. Një ndër parrullat e pjellë gjatë tranzicionit.

Njeriu përveç aftësisë që të përshtatet ka dhe një aftësi tjetër. Ai mund të përshtasë, ndryshojë e përmirësojë realitetin.
Por ndryshe nga kafshët e tjera të pajisura me kthetra, këmbë të shpejta, gjemba apo flatra, njeriu nuk e ka shumë të zhvilluar aftësinë e parë.
Është pikërisht kjo e dyta që e dallon nga kafshët. E kuptuan grekët e lashtë. Është kjo dhurata që na dha Zeusi si kompensim për të mbijetuar në këtë planet, (dikea/logos/tekne).

Ne nuk do mbijetojmë dot nëse imitojmë kafshët (duke u përshtatur) por nëse aktivizojmë atributet humane e hyjnore, duke u bashkuar e ndryshuar këtë realitet asfiksues.

L. DROBONIKU