NGA SHEFI MADHOR I SIGURIMIT QË MERREJ ME MARTIN CAMAJN

Është një dinasti familjare e lidhur që në zanafillën e saj më Sigurimin e Diktaturës terroriste, që ka trashëguar nepotikisht ekskluzivitetin kundër lirisë dhe njerëzve që kërkojnë të jenë të lirë. Për të kuptuar enigmën e zezë, se pse dështon çdo përpjekje për reformë në Drejtësi, duhet ta hedhim vështrimin shumë prapa, në retrospektivë, që të bindemi: nga cilat duar na shërbehet Drejtësia?

Ky është njëri nga modelet e shumta tipike, se nga ç’prejardhje zgjidhen “ekspertët”, që na servirin ligjet dhe se si i bllokojnë ata ligjet e drejta. Të vjen keq, që shumë të djathtë, naivë e të zhgënjyer marrin në thua dhe përfundojnë me formulën mendjelehtë: “Na tradhëtuan tanët”!
Kësaj here ju ftoj të ndiqni një model, se si është trashëguar monopoli politiko-ideologjik i bërjes dhe varrosjes së Drejtësisë, pikërisht nga një dinasti nepotike e lidhur me regjimin gjakatar të Enver Hoxhës, të mësuar të urrejnë genetikisht, që heret kundërshtarët e komunizmit.
E fillojmë gjenezën me Ymer Berberin, me detyrën zëvendësdrejtor i Drejtorisë së Tretë të Sigurimit të Shtetit.

Ai është njëri nga drejtuesit e armës famëkeqe që merrej me Martin Camajn. Ymeri është vjehrri i Fatmir Xhafës që është arkitekti kryesor i “reformës në drejtësi”, si dhe babai i ish gjyqtarit kushtetues Sokol Berberi. Për kujtesë, Sokoli ishte relator i Gjykatës Kushtetuese në vendimi nr. 9, datë 23.3.2010 që rrëzoi “ligjin nr.10034, datë 22.12.2008 “Për pastërtinë e figurës së funksionarëve të lartë të administratës publike dhe të të zgjedhurve”. Rrëzimi u kërkua nga Partia Socialiste, Shoqata Kombëtare e Prokurorëve (përfaqësuar nga djali i një xhelati komunist) dhe Komiteti Shqiptar i Helsinkit (përfaqësuar nga Vasilika Hysi).
Mirë e thotë në një intervistë shkrimtari dhe ish i burgosuri politik, Visar Zhiti: “Këta vunë të bëjnë Demokracinë po ata njerëz që bënë Diktaturën”.