Nis me lotëve ceremonia mortore për Shpat Kasapin (FOTO)

Ceremonia mortore për këngëtarin e ndjerë Shpat Kasapi ka filluar sot në Pallatin e Kulturës në Tetovë. Familjarë, miq, kolegë dhe adhurues të muzikës janë mbledhur për t’i dhënë lamtumirën e fundit artistit, i cili ndërroi jetë papritur në moshën 40-vjeçare nga një atak në zemër.

Me lot në sy, të pranishmit i bëjnë homazhe Kasapit, duke ndarë kujtime dhe emocione mbi ndikimin që ai la në muzikën shqiptare. Në ceremoni janë parë figura të njohura të skenës, si Blero, Adelina Tahiri, Big Mama dhe Dafina Zeqiri, të cilët kanë ardhur për të nderuar karrierën dhe kontributin e artistit.

Big Mama u shfaq veçanërisht e prekur, duke mbajtur një fotografi bardh e zi të Shpatit dhe një shami në dorë. Ajo ka qenë mike e ngushtë dhe kolege e Kasapit që prej vitit 1997, dhe pak ditë para ndarjes së tij nga jeta, Shpati kishte shprehur dëshirën që ata të këndonin së bashku këngën “Sajzeza”.

Pas ceremonisë në Pallatin e Kulturës, procesioni mortor do të vazhdojë drejt varrezave të qytetit, ku Kasapi do të prehet përfundimisht. Varrosja është caktuar të zhvillohet në orën 14:00, ndërsa partnerja e këngëtarit ka bërë të ditur se homazhet do të mbahen edhe ditën e diel, më 30 nëntor.

Gjatë karrierës së tij, Shpat Kasapi mori pjesë në festivale të njohura dhe realizoi bashkëpunime muzikore që lanë gjurmë te publiku. Ai mbeti aktiv dhe i pranishëm në skenën muzikore shqiptare, duke ruajtur popullaritetin deri në vitet e fundit.