Operacion ‘blic’ në Vlorë, 5 të arrestuar për armëmbajtje pa leje

Një aksion i befasishëm policor është zhvilluar mbrëmjen e sotme në qytetin e Vlorës, ku forcat e rendit kanë ndërhyrë në kuadër të një operacioni të organizuar nga Drejtoria Vendore e Policisë.

Sipas informacioneve paraprake, deri në këto momente janë vënë në pranga pesë persona, ndërsa operacioni vijon ende dhe nuk përjashtohet mundësia e ndalimeve të tjera.

Burimet bëjnë me dije se të ndaluarit dyshohen për armëmbajtje pa leje, një vepër penale që mbetet në fokus të kontrolleve të shtuara nga policia në të gjithë vendin.

Aksioni është pjesë e një serie operacionesh që synojnë goditjen e paligjshmërisë dhe rritjen e sigurisë publike, ndërkohë që pritet që në orët në vijim autoritetet të japin një njoftim zyrtar me detaje më të plota mbi ndërhyrjen.

Policia vijon kontrollet në terren, ndërsa hetimet për zbardhjen e plotë të rastit janë në zhvillim.