Pamje të turpshme në KQZ, shoferi parkon si në oborrin e shtëpisë

Një pamje që ka ngjallur reagime është publikuar sot nga ambientet e Komisionit Qendror të Zgjedhjeve (KQZ) në Tiranë. Një automjet është fotografuar teksa është parkuar në mënyrë të gabuar, mbi shtegun e këmbësorëve, fare pranë hyrjes së institucionit.

Në foton e shpërndarë, shihet qartë se makina është futur mes gjelbërimit dhe trotuarit, duke bllokuar plotësisht kalimin e qytetarëve.

Pamja ka ngjallur reagime për faktin se automjeti ndodhet brenda perimetrit të institucionit, duke ngritur dyshime se mund t’i përkasë një punonjësi apo zyrtari të KQZ-së.

Parkimi në mënyrë të tillë ngre pikëpyetje mbi respektimin e rregullave bazë edhe në institucione shtetërore, ku shpesh zyrtarët duket se e trajtojnë hapësirën publike si pronë personale.

Ngjarja po qarkullon gjerësisht në rrjete sociale, me shumë komente ironike ndaj mungesës së shembullit nga institucionet që duhet të zbatojnë ligjin.