Pas skandalit të zbuluar në Spitalin Onkologjik të Qendrës Spitalore Universitare “Nënë Tereza” (QSUT), kryeministri Edi Rama pritet të zhvillojë një takim me shefat e shërbimeve të QSUT-së. Ky takim vjen si një përgjigje ndaj ngjarjeve që kanë tronditur opinionin publik dhe kanë vënë në pikëpyetje besimin e qytetarëve te sistemi shëndetësor.

Detajet e Skandalit

Skandali u zbulua nga Prokuroria e Tiranës, pas denoncimit të një familjari të një pacienti. Hetimet kanë zbuluar se një grup mjekësh në spitalin Onkologjik nuk u ofronin pacientëve shërbimet e nevojshme, por i orientonin drejt klinikës private “Megis”, në pronësi të mjekut Edmond Gashi. Kjo klinikë është pezulluar përkohësisht. Gjithashtu, është zbuluar se mjekët nuk jepnin dozat e plota të ilaçeve për kimioterapi dhe ilaçet e mbetura i shisnin në farmaci të ndryshme në Tiranë.

Mjekët e përfshirë në këtë skandal janë Alketa Pere Ymeri, Brikena Qirjazi, Edmond Gashi dhe koordinatori Emiljano Lela. Ata janë pezulluar nga detyra pas vendimit të Gjykatës së Tiranës.

Manipulimi i Aparaturës së Kobaltit

Një tjetër aspekt shqetësues i skandalit lidhet me aparaturën e Kobalto-Terapisë, e cila nuk është vënë kurrë në funksionim, megjithëse ka qenë në spital që nga viti 2021. Prokuroria ka zbuluar se rrezatimi nga kjo aparaturë ishte 20 herë më i lartë se normat normale, gjë që është fshehur nga disa mjekë, përfshirë ish.zvdrejtoreshën e Onkologjikut, Brikena Qirjazi. Edhe pas denoncimeve të një mjeku, i cili më pas u largua nga puna, situata nuk ndryshoi.

Reagimi i Qytetarëve dhe Masat e Marra

Publikimi i emrave të përfshirë në skandalin e njohur si “dosja Kobalti” ka shkaktuar një reagim masiv nga qytetarët, të cilët janë tronditur nga përmasat e abuzimit dhe korrupsionit. Telefonat e mjekëve dhe koordinatorëve janë mbajtur në vëzhgim për një kohë të gjatë, duke zbuluar biseda dhe pazare për shitjen e medikamenteve dhe tarifat për ndërhyrje kirurgjikale, që varionin nga 4 deri në 5 mijë euro. Këto pazare përfshinin edhe destinacione pushimesh luksoze.

Takimi i Kryeministrit Rama

Në këtë kontekst të rënduar, kryeministri Edi Rama do të takohet me shefat e shërbimeve në QSUT për të diskutuar masat e mëtejshme që duhen marrë për të rikthyer besimin te sistemi shëndetësor.

Ky takim si gjithmonë do të jetë sa për sy e faqe dhe për propagandë.

Gjoja Rama pritet të sjellë në fokus masa konkrete për të përmirësuar transparencën, përgjegjshmërinë dhe etikën profesionale në spitalet publike, si dhe për të garantuar që ngjarje të tilla të mos përsëriten më në të ardhmen.

Ngjarja ka nxitur një debat të gjerë mbi korrupsionin në sistemin shëndetësor dhe nevojën për reforma të thella që do të sigurojnë shërbime më të drejta dhe më të sigurta për pacientët shqiptarë.