Përlotet Adnan Xholi: 28 vite në drejtësi, sakrifica për ligjin dhe familjen

Prokurori i SPAK, Adnan Xholi, një prej kandidatëve për të marrë drejtimin e Strukturës së Posaçme, pati një moment të ndjerë gjatë prezantimit të tij, teksa zëri iu drodh kur foli për familjen dhe ndikimin që ka pasur puna në jetën e tyre.

Duke rikujtuar përballjet me grupet kriminale që në fillesat e karrierës, Xholi u shpreh se kostoja personale ka qenë e pashmangshme. “Cilësia e jetës ka ndryshuar. Unë dhe familja ime nuk jemi më të parët,” tha ai, duke theksuar se ligji dhe detyra kanë qenë gjithmonë prioritet absolut.

Ai u pyet në mënyrë të drejtpërdrejtë për ndikimin njerëzor të këtij profesioni:

Pyetje: “Ju jeni përballur me banda që në fillimet e karrierës. Si ka ndikuar kjo te ju si individ dhe te familja juaj, pra te Adnan Xholi njeriu, jo prokurori?”

Xholi: “Ka ndryshuar cilësia e jetës. Unë dhe familja ime nuk jemi më të parët.”

Në vijim të fjalës së tij, Xholi ndaloi te filosofia e punës dhe eksperienca profesionale.

“Filozofia ime në punë është bashkëpunimi në grup. Nuk mendoj se suksesi i një prokurori matet me numrin e të arrestuarve, por me aktet e forta që mbërrijnë në gjykatë. Jam në vitin e 28-të të ushtrimit të pandërprerë të këtij profesioni. Kam nisur punën si prokuror në vitin 1999, në Gjirokastër,” u shpreh ai.

Mandati i drejtuesit aktual, Altin Dumani, përfundon më 18 dhjetor dhe gara për postin e tij është hapur zyrtarisht. Katër kandidaturat që konkurrojnë janë: Adnan Xholi, Doloreza Musabelliu, Klodjan Braho dhe Elvin Gokaj.