Po peshkonte me dinamit, humb jetën 65-vjeçari në Porto Palermo

Një ngjarje tragjike është shënuar paraditen e së enjtes në zonën e Porto Palermos, në Himarë, ku një 65-vjeçar ka humbur jetën si pasojë e shpërthimit të një lënde plasëse që po përdorte për peshkim të paligjshëm.

Sipas informacioneve paraprake, rreth orës 09:00, shtetasi me iniciale P. M. ishte duke përdorur dinamit për të kapur peshk, kur lënda plasëse ka shpërthyer në mënyrë të pakontrolluar në duart e tij. Si pasojë, ai ka marrë plagë të rënda që rezultuan fatale.

Menjëherë pas incidentit, 65-vjeçari është transportuar me urgjencë drejt Qendrës Shëndetësore të Himarës, por pavarësisht përpjekjeve të mjekëve, nuk ka arritur t’u mbijetojë dëmtimeve të marra.

Policia konfirmoi se ngjarja lidhet me përdorimin e paligjshëm të lëndëve plasëse për peshkim, një praktikë e ndaluar dhe tejet e rrezikshme. Ndërkohë, grupi hetimor, nën drejtimin e Prokurorisë, ka nisur punën në vendngjarje për të sqaruar plotësisht rrethanat dhe për të dokumentuar çdo detaj që lidhet me këtë rast.