Policia “blindon” Vlorën, kontrolle në disa zona

Një aksion i gjerë policor ka nisur në qytetin e Vlorës, ku janë ngritur disa pika kontrolli për verifikimin e automjeteve dhe evidentimin e shkeljeve të rregullave të qarkullimit rrugor.

Në fokus të operacionit janë drejtuesit e mjeteve që kanë gjoba të papaguara, por edhe ata që nuk respektojnë detyrimet e përcaktuara në Kodin Rrugor.

Kontrollet janë përqendruar në disa zona të qytetit. Në një prej pikave të ngritura në hyrje të Vlorës, efektivët po ndalojnë automjetet dhe po verifikojnë drejtuesit për përdorimin e rripit të sigurimit, përdorimin e telefonit gjatë drejtimit të mjetit, si dhe për raste të dyshuara të drejtimit nën efektin e lëndëve narkotike.

Përveç kontrolleve rrugore, uniformat blu po kryejnë edhe verifikime në brendësi të automjeteve, për të evidentuar nëse transportohen sende apo materiale të kundërligjshme.

Sipas informacioneve paraprake, aksioni nuk do të jetë një ndërhyrje e përkohshme, por pritet të vijojë përgjatë disa ditëve. Deri më tani raportohet për një numër të konsiderueshëm gjobash të vendosura ndaj drejtuesve që janë konstatuar në shkelje.