Protesta nuk ndalet, sot plot 68 ditë revoltë kundër sistemit politik

Protestat kundër kryeministrit Edi Rama vijojnë pa ndërprerje në të gjithë vendin, duke shënuar sot ditën e 68-të radhazi. Qytetarë nga zona të ndryshme pritet të mblidhen sërish, duke përsëritur kërkesën e tyre kryesore: largimin e kreut të qeverisë.

Protestuesit janë shprehur të vendosur se dorëheqja e kryeministrit është një kërkesë e panegociueshme dhe kanë paralajmëruar se mobilizimi do të vazhdojë deri në arritjen e këtij qëllimi.

Krahas dorëheqjes së Edi Ramës, qytetarët kërkojnë gjithashtu krijimin e një qeverie teknike me mandat 12-mujor, si dhe nisjen e hetimeve ndaj kryeministrit nga Strukturat e Posaçme kundër Korrupsionit dhe Krimit të Organizuar (SPAK).

Në deklaratat e tyre, protestuesit akuzojnë qeverinë për keqqeverisje dhe korrupsion, duke theksuar se situata aktuale kërkon ndryshim të menjëhershëm politik. Sipas tyre, largimi i kryeministrit është hapi i parë drejt rikthimit të besimit te institucionet dhe funksionimit të shtetit të së drejtës.