Rama gënjen edhe bebet për bonusin special

Qeveria u ka 5.2 milionë Euro borxh edhe të lindurve pas muajit tetor 2013, ndërsa Rama mashtroi me shifrat e lindje-shpërblimeve që publikoi 2 javësh; mbasi qysh prej muajit janar 2019 kur ka hyrë në fuqi vendimi i bonusit “extra” për fëmijën e parë, të dytë e të tretë, nuk janë bërë 91 mijë e 380 pagesa siç thotë kryeministri,  por vetëm 3114 pagesa të aplikuara prej Ministrisë së Shëndetësisë që ka detyrim zbatimin e vendimit

Dy javë më parë, në mungesë të videove “3D” apo shifrave false për rritjen e mirëqenies së popullit; kryeministri Rama, njoftoi se 20 mijë fëmijë të lindur në periudhën janar-qershor 2021, kanë përfituar bonusin “extra” të bebes, shtesë mbi bonusin ligjor 5000 lekë.

“Lajmi i bukur”, siç e quajti kryeministri, ishte sa për propagandë mediatike, në këtë kohë të trazuar korrupsioni të shfrenuar; sepse numri i lindjeve gjatë 6 muajve të parë të vitit 2021, nuk është 20 mijë, por 12 mijë e 310 bebe të ardhura në jetë.

Kryeministri deklaroi, se në zbatim të VKM nr. 740, datë 12.12.2018, janë paguar 91 mijë e 380 pagesa të bonusit në vlera 40 mijë lekë fëmija i parë, 80 mijë lekë i dyti e 120 mijë lekë i treti.

Edhe kjo shifër e kryeministrit, është mashtrim i dyfishtë, mbasi qysh prej datës 1 janar 2019 e deri me 30 qershor 2021, në Shqipëri e jashtë saj nga familje emigrante shqiptare, janë lindur vetëm 52 mijë e 87 fëmijë.

Së dyti, referuar informacionit nga Ministria e Financave, rezulton se për periudhën janar 2019-qershor 2021, nuk janë bërë 91 mijë e 380 pagesa nga 40 mijë, 80 mijë e 120 lekë te reja, por vetëm 3114 pagesa, kaluar si transaksione të aplikuara prej Ministrisë së Shëndetësisë, që ka detyrim zbatimin e vendimit për bonusin.

Mashtrim i heshtur qysh prej muajit tetor 2013, po bëhet dhe me bonusin 5000 lekë, që duhet të japin bashkitë, si buxhet që u rimbursohet nga qeveria me Ligj nr. 9929, datë 09.06.2008.

Mirëpo as ky bonus lëmoshë nuk po jepet prej 8 vitesh, paçka se prindërit e kërkojnë dhe kanë bërë ankime te Avokati i Popullit e te vetë kryeministri; madje dhe denoncime në prokurori, me dyshimin se ky bonus vidhet nga zyrtarë të bashkive e të Ministrisë së Shëndetësisë.

Skandal e madje krim ndaj shëndetit të bebeve, po bën edhe kryebashkiaku Erjon Veliaj me bonusin 5000 lekë, i cili nuk ua jep prindërve në vlerë lekë siç e përcakon ligji, por ua jep produkte e mallra.

Në shkelje të plotë të ligjit, Lali Eri ka sajuar “Shportën e Bebes” me vlerë 5000 lekë për çdo fëmijë të lindur, duke blerë produkte skarco mes tyre dhe detergjentë e ushqime fëmijësh, te depot e “Big Market”, biznes i deputetit të PS, Vullnet Sinaj.

Ky skandal i kryebashkiakut Erjon Veliaj, mbasi përveçse është shkelje ligjore me bazë vjedhjen; së pari është krim shëndetësor ndaj bebeve, të cilëve nuk u jepet bonusi 5000 lekë, por u konvertohet me detyrim në produkte të skaduara.

Ndërsa 36 bashki të mëdha që kanë fonde, nuk e japin fare bonusin 5000 lekë të bebeve, pa llogaritur bashkitë e vogla, të cilat nuk kanë fonde e nuk bëhet fjalë të jepet ky bonus.  

Sipas të dhënave, borxhi i shtetit ndaj bebeve deri më 31 dhjetor 2018, kanë qenë 2.4 milionë Euro, ndërsa krejt borxhi në 8 vitet e pushtetit “rilindja”, është 5.2 milionë Euro, mirëpo kryeministri, këtë mashtrim e quan vendim të zbatuar dhe premtim të mbajtur.