Replikat për raportin e Dick Marty, Basha: Po bën zëdhënësin e Beogradit! Rama: Fol Lulëzim, thuaje të vërtetën!
Kryetari i Partisë Demokratike, Lulzim Basha i është përgjigjur sërish kryeministrit Rama, për sa i përket raportit të Dick Marty, në të cilin thuhej se në vendin e quajtur “Shtëpia e Verdhë” në Mat, ishte bërë transplantim organesh nga UÇK mbi robërit serbë.
Përmes një postimi në rrjetet sociale, Basha shkruan se Rama po bën zëdhënësin e Beogradit, në vend që të bëjë detyrën.
Më tej kreu i PD-së shprehet se kryeministri Edi Rama është përgjegjës për humbjen e jetëve të shqiptarëve, si pasojë e koronavirusit.
“Në vend që të bëjë detyrën, Edi Rama bën zëdhënësin e Beogradit. Ai është përgjegjës për jetët e humbura dhe shëndetin e shqiptarëve. Të sëmurët dergjen nëpër ambulanca sepse spitalet janë mbushur plot. Pasi shkatërroi ekonominë ai ka humbur kontrollin mbi pandeminë”, shkruan Basha.
Ndërkohë që menjëherë i është përgigjur edhe kryeministri Rama, i cili i bën një pyetje Bashës nëse ka përdorur maskë që kur merrte në pyetje shqiptarët per llogari të Dick Martin. Ai i ka bërë thirrje Bashës që të thotë të vërtetën.
“Pse Beogradi nuk e donte raportin e Dick Marty prandaj e miratuat ju Lulëzim! Dhe meqë ra fjala a është e vërtetë që ke përdorur maskë qysh atëherë, kur merrje në pyetje shqiptarët për llogari të zotit Dick apo edhe kjo është sajesë e Beogradit? Fol Lulēzim, thuaje të vërtetën!” shkruan Rama.
Keni një histori? Denonco anonimisht, identiteti juaj mbrohet.
Denonco
