Rezultoi me baktere, AKU tërheq nga tregu qumështin e bebeve të Nestle

Autoriteti Kombëtar i Ushqimit (AKU) ka njoftuar tërheqjen e menjëhershme nga tregu të produktit për foshnja “NAN 1 OPTIPRO”, pas konstatimit të pranisë së një bakteri të rrezikshëm.

Sipas AKU-së, pas kryerjes së kontrolleve dhe procedurave të gjurmueshmërisë, është bllokuar e gjithë sasia e produktit që ndodhej ende në qarkullim, si edhe ajo që ishte kthyer nga tregu. Produkti do t’i nënshtrohet asgjësimit ose do të kthehet në vendin e origjinës.

Në njoftimin zyrtar bëhet me dije se masa është marrë pas informimit nga subjekti importues në Shqipëri, i cili është vënë në dijeni nga kompania prodhuese Nestlé. Kjo e fundit ka ndërmarrë tërheqjen si masë parandaluese, pasi në fabrikën prodhuese në Holandë është zbuluar prania e bakterit cereulide në një lot të caktuar të produktit.

Të dhënat e produktit të prekur janë:

• Emërtimi: NAN 1 OPTIPRO

• Pesha: 800 gram

• Loti: L 51230346AE

• Afati i përdorimit: 30/05/2027

AKU sqaron gjithashtu se gjatë verifikimeve në terren është konstatuar se supermarketet ku ky produkt është tregtuar kanë afishuar njoftimet për konsumatorët, me qëllim informimin dhe parandalimin e çdo rreziku të mundshëm.