Sa na kushton kapelja e Ramës?

Përditësuar më 11 July 2021, 17:52

Pse me kapele do merret kryeministri?! Ç’i kini këto broçkulla! A jeni në metro mo?! – i hakërrehej me përçmim gazetarit Ilir Babaramo në një emision tre ditë para zgjedhjeve të 25 prillit. Rreth dy muaj pas zgjedhjeve të 25 prillit  9 zyrtarë tē Ministrisë se Brendëshme  u arrestuan pikërisht edhe për kapelen që pyeti gazetari  kryeministrin. Çmimi i hajdutëve të vegjel të tenderimeve u caktua për një kapele  350 euro.

Armani  stilisti me famë botërore  për kuriozitetin e tenderistëve dhe  ish- ministrit ‘të gazit lotsjellës’  Sandër Lleshajt  i cili duhet të ishte  në burg bashkë me hajdutët e vegjēl, dizenjon kapelen e komandantit të përgjithshëm të karabienerisë italiane. Prodhohet vetëm 1 copë , 80% punë me dorë dhe kushton 135 euro!

Ndërsa stilistët e lubisë së tenderave të qeverise Rama  tenderojnë 22 mijë kapele për policinë  me çmim  350 € një kapele?!

1 kapele e policit shqiptar sa 3 kapele të gjeneralit karabiniereve të Italisë (prodhuar nga Giorgio Armani) .

Po ku qëndron problemi dhe ndryshimi kur  Damiani i Gjiknurajve tenderonte 1 km rrugë 20 milionë euro?! Thjeshtë sasia e eurove që paguajmë ne  për xhepat e  pangopur të rrjetit ‘Ta rrjepim sa më shumë këtë popull’.

Nuk ka institucion në Republikën tonë të bananeve që të mos vidhet ditën për diell me prokurime, te drejtpërdrejta, të kêrkuara dhe të pakêrkuara.  Me tendera online  dhe me letra.

Në të gjitha bashkitë e vendit pa asnjë përjashtim ka Fatostushër si ai Lushnjes

Në ministri, në kancelaritë e universiteteve. Të babëzitur dhe të pangopur nga vjedhja  nuk kanë të ndalur aspak dhe nuk ka SPAK që u bën derman.

Këtu vjedhja është  ADN-ja e qeverisjes në çdo dikaster. Të gjithë i dimë hajdutët por as nuk e vëmë ujët në zjarr për ti denoncuar.

Por  kërkojmë lidhje  me ta për tu bërë pjesë e zhvatjes  me ta ose thjeshtë jemi indiferentë duke menduar se janë lekët e shtetit. Sepse shtetin e shohim si lopë që teorikisht është i yni por praktikisht e mjel vetëm Maliqi i pushtetit. Korrupsioni i vërtetë vjen nga kapelja e Ramës e cila na ka kushtuar dhe do na kushtojë shumë shtrenjt në vite.

Kapelja e Ramës nuk kushton 325 euro sa e një polici . Ajo na kushton 81% të borxhit publik, na kushton sistemin e dështuar të shëndetësisê, na kushton arsimin copë-copë. Na kushton varfërinë e 2 milionë banorëve të këtij vendi.

Kapelja e Ramës na kushton  sa mafia e plehrave dhe koncensionet e inceneratorëve. Na kushton sa mafia e betonit dhe lavatriçes së parave  të pista në Tiranë.  

Kapelja e  Ramës na kushton sa  liria e fjalës  dhe  kjo kapele u ka zënë figurën  e  sytë mediave   dhe u ka mekur audion  e në fakt mediat  që do të duhet   të ishin vigjilentë në çdo institucion dhe zyrë të Republikës bëjnë propagandë dhe numërojnë me video viktimat e aksidenteve rrugore.

Kapelja e Ramēs  na ka zënë sytë dhe tularur  të gjithëve. Duket sikur dhe diellin e komandon kjo kapele. Opozita që nuk ka fare  kapele nuk po gjen një copë hije të fusë kokën deri në shtator kur do t’i  duhet  ose të zbatojë këshillat  nga rruga e Elbansanit ose  të bëjë zhurmë për doktorin.Ose të krijojë njē front të gjërë me shqiptarët që do të mbeten këtu dhe të mbajë ekuilibrin e demokracisë. E sigurtë është  që shtatori na  gjen  me Ramën me një   kapele  me ngjyrë të re por me avaz të vjetër.