Shkarkohet nga detyra drejtori i ASHK-së Sarandë

Vetëm pesë muaj pas marrjes së detyrës, drejtori i Agjencisë Shtetërore të Kadastrës (ASHK) në Sarandë, Ilir Çibuku, është shkarkuar. Vendimi është firmosur nga Drejtoresha e Përgjithshme e ASHK-së, Lorena Goxhobelli, me arsyetimin “performancë e dobët në ofrimin e shërbimeve dhe trajtimin e aplikimeve të qytetarëve”.

Burime brenda institucionit bëjnë të ditur se shkarkimi është rezultat i një procesi të brendshëm vlerësimi, i cili analizoi efikasitetin dhe cilësinë e punës në zyrat vendore të Kadastrës.

Sipas raportit të përpiluar, zyra e Sarandës është renditur ndër ato me numrin më të lartë të ankesave nga qytetarët dhe me vonesa të ndjeshme në përpunimin e aplikimeve për dokumentet pronësore.

Pas largimit të Çibukut, në krye të zyrës është komanduar përkohësisht një punonjës i brendshëm i institucionit, deri në emërimin e një drejtuesi të ri.

Ky është ndryshimi i dytë në drejtimin e ASHK Sarandë brenda më pak se një viti, çka tregon për probleme të vazhdueshme në administrimin dhe shërbimin ndaj qytetarëve në këtë zyrë.