Shpërthim tragjik në Greqi, humbin jetën 2 shqiptarë

Shkon në dy numri i punëtorëve shqiptarë që kanë humbur jetën pas shpërthimit në fabrikën e kompanisë “Motor Oil”, në Agioi Theodoroi të Greqisë. Viktima e dytë është identifikuar si Dorian Hysa, 50 vjeç, i cili ndërroi jetë mesditën e së dielës, më 11 tetor, në spitalin “Thriasio” të Elefsinës.

Sipas medias greke thriassio.gr, Hysa ndërroi jetë pak para orës 13:00, pasi nuk arriti të rikuperohej nga dëmtimet e rënda të pësuara gjatë shpërthimit.

50-vjeçari kishte marrë plagë të rënda në kokë dhe, për shkak të gjendjes kritike, mjekët e kishin intubuar. Pavarësisht ndërhyrjeve dhe trajtimit mjekësor, ai nuk arriti t’u mbijetonte dëmtimeve.

Hysa është shqiptari i dytë që humb jetën si pasojë e këtij aksidenti në impiantin industrial të naftës. Dy ditë më parë, më 9 tetor, ndërroi jetë edhe Robert Cakaj, 43 vjeç, i cili kishte pësuar dëmtime të shumta nga shpërthimi.

Cakaj ishte dërguar në Njësinë e Djegieve në spitalin “Thriasio”, por gjendja e tij shëndetësore u përkeqësua, duke përfunduar me humbjen e jetës.

Ndërkohë, autoritetet greke kanë arrestuar tre drejtues të kompanisë “Motor Oil”, të cilët, sipas raportimeve, kishin përgjegjësi për mbikëqyrjen e punimeve ku ndodhi aksidenti.

Hetimi po përqendrohet te kushtet në të cilat kryheshin punimet e mirëmbajtjes dhe te zbatimi i rregullave të sigurisë për mbrojtjen e punonjësve. Autoritetet pritet të sqarojnë rrethanat e shpërthimit dhe nëse ka pasur shkelje apo mangësi në masat e marra për parandalimin e aksidenteve.

Vdekja e Dorian Hysës e çon në dy numrin e punëtorëve shqiptarë që humbën jetën në këtë ngjarje tragjike, ndërsa hetimet do të përcaktojnë përgjegjësitë për aksidentin.