“Shqipëria Bëhet” protestë para Kryeministrisë, kërkohet dorëheqja e Ramës

Lëvizja “Shqipëria Bëhet” ka nisur protestën e paralajmëruar përpara godinës së Kryeministrisë në Tiranë, ku dhjetëra qytetarë dhe mbështetës të saj janë mbledhur në bulevard për të kërkuar dorëheqjen e kryeministrit Edi Rama.

Organizatorët e cilësojnë këtë tubim si protestën e pestë kombëtare të lëvizjes, ndërsa theksojnë se prej më shumë se dy muajsh aktivistët e “Shqipëria Bëhet” kanë zhvilluar qëndresa të vazhdueshme përpara Kryeministrisë në shenjë kundërshtie ndaj qeverisë.

Protesta po zhvillohet nën praninë dhe monitorimin e forcave të policisë, ndërsa deri në këto momente nuk janë raportuar incidente apo përplasje.

Gjatë fjalës së tij para protestuesve, kreu i lëvizjes Adriatik Lapaj bëri thirrje për bashkim qytetar dhe reagim kundër asaj që ai e cilësoi si vjedhje sistematike të pasurisë publike.

“Të gjithë bashkë për të kërkuar Shqipëri më të mirë. Besoj te fuqia e individit, sepse individët kanë ndryshuar kombin”, u shpreh Lapaj para mbështetësve të mbledhur në protestë.

Organizatorët kanë paralajmëruar se lëvizja e tyre do të vijojë me protesta dhe aktivitete të tjera nëse, sipas tyre, kërkesat e qytetarëve për ndryshim politik nuk merren parasysh.