Shqiptarët në revoltë, sot protesta e 16 kundër epokës Rama-Berisha

Kjo e hënë shënon protestën e 16 radhazi kundër kryeministrit Edi Rama dhe kreut të opozitës Sali Berisha, e cila pritet të mbledhë qytetarë nga e gjithë Shqipëria në një tjetër tubim masiv në kryeqytet.

Protesta do të nisë në orën 18:00 në sheshin “Skënderbej”, ku qytetarët do të mblidhen për të shprehur pakënaqësinë e tyre dhe për të artikuluar kërkesat ndaj qeverisë. Më pas, pritet që tubimi të vijojë me marshim drejt Kryeministrisë dhe në rrugët kryesore të Tiranës.

Organizatorët dhe pjesëmarrësit kanë paralajmëruar një mobilizim të gjerë, ndërsa thirrjet kryesore mbeten dorëheqja e kryeministrit dhe ndryshimi i situatës politike në vend. Slogane si “Edi Rama jep dorëheqjen” dhe “Atdheu nuk shitet” pritet të dominojnë protestën.

Paralelisht, protesta janë paralajmëruar edhe në qytete të tjera të vendit si Vlora, Durrësi, Shkodra dhe Pogradeci, duke reflektuar një përfshirje më të gjerë qytetare.

Gjithashtu, priten reagime dhe tubime simbolike edhe nga shqiptarët jashtë vendit, të cilët kanë shprehur mbështetje për protestat në Shqipëri.

Protesta e sotme vjen në një klimë të tensionuar politike dhe shihet si një tjetër moment i rëndësishëm në valën e reagimeve qytetare kundër qeverisë.