S’i pëlqeu prerja e flokëve, shqiptari sulmon brutalisht berberin

Një incident i pazakontë dhe i dhunshëm është shënuar në Pylos të Greqisë, ku një 25-vjeçar me origjinë shqiptare sulmoi brutalisht një berber 51-vjeçar, pasi nuk ishte i kënaqur me prerjen e flokëve.

Sipas raportimit të mediave greke, i riu fillimisht pati një debat verbal me berberin brenda dyqanit, duke shprehur pakënaqësinë për shërbimin. Pas ofendimeve, ai u largua nga ambientet e berberhanes, por ngjarja nuk përfundoi me kaq.

Pak kohë më vonë, 25-vjeçari u rikthye i armatosur me një shkop gome dhe sulmoi 51-vjeçarin. Ai e goditi dhe e rrëzoi përtokë berberin, duke e rrahur për më shumë se 10 minuta. Dhuna vazhdoi edhe jashtë lokalit, ku agresori shkaktoi dëme të shumta edhe në automjetin e viktimës, përpara se të largohej nga vendi i ngjarjes.

Banorët e zonës që dëgjuan zhurmat dhe panë skenat e dhunës njoftuan menjëherë policinë. Forcat e rendit ndërhynë dhe arritën të arrestojnë 25-vjeçarin, i cili u shoqërua në komisariat dhe më pas u paraqit para prokurorit për veprimet e tij.

Autoritetet greke po hetojnë rrethanat e plota të incidentit, ndërsa ndaj të riut pritet të rëndojnë akuza për dhunë të rëndë dhe shkatërrim prone.