S’ka më dyshime, Berisha i pret biletën ‘one-way’ Ervin Salianjit

Kryetari i Partisë Demokratike, Sali Berisha, deklaroi se ish-deputeti Ervin Salianji është vetëpërjashtuar nga radhët e PD-së.

Deklarata u bë pas përfundimit të mbledhjes së Këshillit Kombëtar të Partisë Demokratike, zhvilluar në selinë blu, ku Berisha u pyet nga gazetarët lidhur me reagimet e fundit të Salianjit dhe mungesën e tij në këtë forum.

“Besoj se jam shprehur përfundimisht në konferencën e shtypit. Ai ju ka akuzuar ju se bashkëpunimi me krimin qenka vijë e kuqe. Edhe njëherë, gjithçka kam pasur për këtë çështje e kam thënë si kryetar i PD-së dhe asgjë nuk e ndryshon këtë qëndrim”, u shpreh Berisha.

Deklarata e Berishës vjen një ditë pasi Ervin Salianji sqaroi publikisht se mungesa e tij në mbledhjen e Këshillit Kombëtar kishte qenë e qëllimshme, duke lënë të kuptohet për një distancim të hapur nga drejtimi aktual i partisë.

I pyetur për protestën kombëtare të paralajmëruar më 22 dhjetor përpara Kryeministrisë, Berisha u shfaq optimist për një mobilizim masiv të opozitës dhe qytetarëve.

“Kjo është mbledhja e tretë radhazi e forumeve të Partisë Demokratike – Kryesia, Grupi Parlamentar dhe Këshilli Kombëtar – të gjitha në një linjë të qartë politike që shënon fillimin e revoltave. Këto protesta do të ndalen vetëm kur ky regjim të arkivohet në banesën e turpit të historisë. Ka një gatishmëri dhe vendosmëri që nuk e imagjinoni dot. Një energji që kjo parti nuk e ka pasur kurrë më parë”, deklaroi Berisha.