Sot dita e 56 e protestës, qytetarët i thonë “Jo” ‘Besës’ së Ramës

Protesta kundër qeverisë vijon pa ndërprerje dhe hyn sot në ditën e saj të 56-të, me qytetarët që pritet të mblidhen sërish në mbrëmje përpara godinës së Kryeministrisë në Tiranë. Tubimet e përditshme kanë marrë formën e një qëndrese të vazhdueshme, ku pjesëmarrësit theksojnë se nuk do të tërhiqen pa arritur qëllimin e tyre kryesor.

Gjatë protestës së zhvilluar një ditë më parë, aktivistë dhe qytetarë reaguan ndaj deklaratave të kryeministrit Edi Rama, i cili prezantoi platformën “Besa” në mbledhjen e Grupit Parlamentar të Partisë Socialiste, duke e cilësuar atë si një përpjekje për një raport të ri me qytetarët.

Nga podiumi përballë Kryeministrisë, protestuesit e hodhën poshtë këtë nismë, duke theksuar se besimi nuk mund të rikthehet pas më shumë se një muaji protesta të pandërprera. Sipas tyre, qeveria e ka humbur kredibilitetin dhe çdo iniciativë e re shihet si tentativë për të zbutur reagimin publik.

Në fjalimet e mbajtura, aktivistët nënvizuan se qëndrimi i tyre mbetet i pandryshuar. Ata refuzojnë çdo platformë apo premtim të ri dhe kërkojnë vetëm largimin e kryeministrit nga detyra. Po ashtu, u theksua nevoja për përballje me drejtësinë pas dorëheqjes dhe krijimin e një qeverie tranzitore që do të garantojë zgjedhje të lira dhe të ndershme.

Në përfundim të tubimit, qytetarët zhvilluan marshimin e përnatshëm në rrugët e Tiranës, duke artikuluar thirrje si “Rama ik”, “Dorëheqje” dhe “Shqipëria nuk dorëzohet”.

Edhe këtë mbrëmje, protestuesit pritet të rikthehen sërish para Kryeministrisë, duke konfirmuar vendosmërinë e tyre për të vijuar protestën deri në realizimin e kërkesës kryesore: dorëheqjen e kryeministrit Edi Rama.